പൊന്നാനി:പൊന്നാനിയില്‍ മത്സ്യ ബന്ധനത്തിന് പോയ ബോട്ട് പുറങ്കടലില്‍ മുങ്ങി താഴ്ന്നു.മണിക്കൂറുകളോളം പുറംകടലില്‍ ഒഴുകി നടന്ന ആറോളം ജീവനക്കാരെ പുലര്‍ച്ചെയോടെ മത്സ്യത്തൊഴിലാളികള്‍ കണ്ടെത്തി രക്ഷപ്പെടുത്തി.ശനിയാഴ്ച പുലര്‍ച്ചെ 12 മണിയോടെ പൊന്നാനി ഹാര്‍ബറില്‍ നിന്ന് മത്സ്യ ബന്ധനത്തിന് പോയ ‘അറഫ’എന്ന ബോട്ടാണ് 3 മണിയോടെ പുറംകടലില്‍ തകര്‍ന്നത്.
പൊന്നാനി സ്വദേശി കുട്ടൂസക്കാനകത്ത് അബ്ദുട്ടി യുടെ പേരിലുള്ള ബോട്ടില്‍ അബ്ദുട്ടി അടക്കം 6 പേരുണ്ടായിരുന്നു.പൊന്നാനിയില്‍ നിന്ന് 22 നോട്ടിക്കല്‍ മൈല്‍ ദൂരത്ത് പുറംകടലില്‍ എന്തിലോ ശക്തമായി ഇടിച്ച ബോട്ട് നിമിഷങ്ങള്‍ക്കകം പൂര്‍ണ്ണമായും തകര്‍ന്ന് മുങ്ങി താഴുകയായിരുന്നുവെന്ന് രക്ഷപ്പെട്ട ജീവനക്കാര്‍ പറഞ്ഞു.3 മണിക്കൂറോളം കടലില്‍ ഒഴുകി നടന്ന ജീവനക്കാരെ പുലര്‍ച്ചെ മത്സ്യബന്ധനത്തിന് പോയ ബോട്ടിലെ ജീവനക്കാരാണ് കണ്ട് രക്ഷിച്ച് കരയിലെത്തിച്ചത്. ഇവരെ പൊന്നാനി താലൂക്ക് ആശുപത്രിയില്‍ എത്തിച്ചു. 5 ഇതരസംസ്ഥാന തൊഴിലാളികളെയും ബോട്ട് ഓടിച്ചിരുന്ന അബ്ദുട്ടിയെയുമാണ് ആശുപത്രിയില്‍ പ്രവേശിപ്പിച്ചത്.
