വളപട്ടണം മന്നയിലെ അരി മൊത്ത വ്യാപാരി കെ പി അഷറഫിന്റെ വീട്ടില്നിന്ന് 300 പവന് സ്വര്ണവും ഒരു കോടി രൂപയും കവര്ന്ന കേസിലെ പ്രതി പിടിയില്. സമീപവാസിയായ കൊച്ചു കൊമ്പല് വിജേഷാ(30)ണ് അറസ്റ്റിലായത്. കവര്ച്ച ചെയ്ത പണവും ആഭരണങ്ങളും ഇയാളുടെ കട്ടിലിനടിയില്നിന്ന് കണ്ടെടുത്തു
വീടുമായി നല്ല പരിചയമുള്ളയാളാണ് കവര്ച്ച നടത്തിയതെന്ന് പോലീസ് നേരത്തെ തന്നെ മനസിലാക്കിയിരുന്നു. അഷ്റഫും കുടുബവും വീട് പൂട്ടി മധുരയില് വിവാഹത്തില് പങ്കെടുക്കാന് നവംബര് 19 ന് രാവിലെ വീട് പൂട്ടി പോയതായിരുന്നു. 24ന് രാത്രി തിരിച്ചെത്തിയപ്പോഴാണ് വീടിന്റ ജനല് തകര്ത്ത് അകത്ത് കയറിയ മോഷ്ടാവ് ലോക്കറില് സൂക്ഷിച്ച പണവും ആഭരണവും കവര്ന്നത് അറിയുന്നത്
ഞായറാഴ്ച രാവിലെ പ്രതിയുടെ മൊബൈല് ഫോണ് പോലീസ് കസ്റ്റഡിയില് വാങ്ങിയിരുന്നു. വൈകിട്ട് തിരിച്ച് വാങ്ങാന് പോലീസ് ആവശ്യപ്പെട്ടു. ഇത് വാങ്ങാന് എത്തിയപ്പോഴാണ് കസ്റ്റഡിയില് എടുത്തത്. തുടര്ന്ന് ചോദ്യം ചെയ്യലില് പ്രതി കുറ്റം സമ്മതിച്ചുവെന്ന് പോലീസ് പറഞ്ഞു. ഇയാള് വെല്ഡിങ് തൊഴിലാളിയാണ്. സിസിടിവി ദൃശ്യങ്ങളും വിരലടയാളവും കേന്ദ്രീകരിച്ച് നടത്തിയ അന്വേഷണത്തിലാണ് ഇയാള് പിടിയിലായിരിക്കുന്നത്.
മോഷണം നടന്ന സാഹചര്യവും രീതിയും പരിശോധിച്ചപ്പോള് വീടിനെപ്പറ്റി ധാരണയുള്ള ഒരു വ്യക്തിയാണ് പിന്നില് എന്ന് പൊലീസിന് സംശയമുണ്ടായിരുന്നു. പരമാവധി സിസിടിവികളില് പെടാതെ അതിവിദഗ്ധമായിട്ടായിരുന്നു മോഷണം. കൃത്യമായി, എവിടെയെല്ലാം ക്യാമറകള് ഉണ്ട് എന്നറിഞ്ഞ പോലെയായിരുന്നു മോഷണരീതി. ശേഷം വീടിന് പിന്നിലെ റെയില്വേ ട്രാക്കിലൂടെ മോഷ്ടാവ് കടന്നുകളഞ്ഞു. ഇവയെല്ലാം പരിശോധിച്ച പൊലീസ് പ്രദേശത്തെക്കുറിച്ച് നന്നായി അറിയാവുന്ന ഒരാളാണ് മോഷണത്തിന് പിന്നില് എന്ന നിഗമനത്തില് എത്തിയിരുന്നു. ഇതോടെ ലിജീഷിലേക്ക് അന്വേഷണം എത്തുകയും പിടിയിലാവുകയും ആയിരുന്നു
