ചങ്ങരംകുളം:കാർഷിക മേഖല നേരിടുന്ന ഏറ്റവും വലിയ വെല്ലുവിളികളായ തൊഴിലാളി ക്ഷാമത്തിനും അമിത കൂലി ചിലവിനും സ്വന്തം രീതിയിൽ പരിഹാരം കണ്ടെത്തി മാതൃകയാവുകയാണ് ആലങ്കോട് പഞ്ചായത്തിലെ എറവറാംകുന്ന് പ്രദേശത്തെ ‘പൈതൃക കർഷക സംഘം.കൃഷി പൂർണ്ണമായും യന്ത്രവൽക്കരിച്ചുകൊണ്ടാണ് ഈ കർഷക കൂട്ടായ്മ കാർഷിക മേഖലയിൽ സ്വയം പര്യാപ്തത കൈവരിച്ചിരിച്ചത്.
കൃഷിയിടം ഒരുക്കുന്നത് മുതൽ വിളവെടുപ്പ് വരെയുള്ള വിവിധ ഘട്ടങ്ങൾക്കായി ട്രാക്ടർ, വരമ്പ് വെക്കുന്ന മെഷീൻ,റൊട്ടവേറ്റർ, ടില്ലർ മെഷീൻ, കേജ് വീൽ, കരി, പുല്ല് വെട്ടുന്ന യന്ത്രം തുടങ്ങിയ അത്യാധുനിക കാർഷിക ഉപകരണങ്ങളാണ് സംഘം സ്വന്തമായി വാങ്ങിയിട്ടുള്ളത്. ഈ യന്ത്രങ്ങൾ തങ്ങളുടെ കൃഷി ആവശ്യങ്ങൾക്ക് പുറമെ, പ്രദേശത്തെ മറ്റ് സാധാരണക്കാരായ കർഷകർക്കും മിതമായ നിരക്കിൽ വാടകയ്ക്ക് നൽകുമെന്ന് ഭാരവാഹികൾ പറഞ്ഞു.ഇത് ചങ്ങരംകുളം മേഖലയിലെ മറ്റ് കർഷകർക്കും വലിയ ആശ്വാസമാകും.കഴിഞ്ഞ 10 വർഷമായി കാര്ഷിക രംഗത്ത് സജീവമായ മുതിർന്നവരും യുവാക്കളും വിദ്യാർത്ഥികളും അടങ്ങുന്ന 11 പേരടങ്ങുന്ന സംഘമാണ് ഈ സജീവ കർഷക കൂട്ടായ്മ
സംഘത്തിന്,ഉൽപ്പാദന മേഖലയിലെ മികച്ച പ്രവർത്തനങ്ങൾ മുൻനിർത്തി സംസ്ഥാന സർക്കാരിന്റെ 2023-2024 വർഷത്തെ ‘മികച്ച കൃഷിക്കൂട്ടത്തിനുള്ള സംസ്ഥാന കർഷക അവാർഡും ലഭിച്ചിട്ടുണ്ട്.നെൽക്കൃഷിക്ക് പുറമെ കൃത്യതാ കൃഷി രീതിയിലുള്ള (Precision Farming)പച്ചക്കറി കൃഷി, തണ്ണിമത്തൻ,ഷമാം, പപ്പായ,ഇഞ്ചി,മഞ്ഞൾ കൃഷികളും ഇവർ വിജയകരമായി നടത്തി വരുന്നുണ്ട്. കൂടാതെ ഉപജീവനത്തിനായി മത്സ്യകൃഷി, മുയൽ, കോഴി, പശു, താറാവ് വളർത്തൽ, തേനീച്ച വളർത്തൽ എന്നിവയും ഇവർ നടത്തി വരുന്നുണ്ട്.തങ്ങൾ ഉത്പാദിപ്പിക്കുന്ന സാധനങ്ങളും മൂല്യവർദ്ധിത ഉൽപ്പന്നങ്ങളും,കൃഷിക്ക് ആവശ്യമുള്ള ഉൽപ്പന്നങ്ങളും ചങ്ങരംകുളത്തെ പൈതൃക ഇക്കോ ഷോപ്പിൽ ലഭ്യമാണ്. എഫ്.പി.ഓ (FPO) വിപണന കേന്ദ്രങ്ങൾ എന്നിവ വഴിയും ഓൺലൈൻ വഴിയും നേരിട്ട് ഉപഭോക്താക്കളിൽ എത്തിക്കുന്നുണ്ട്.ശാസ്ത്രീയവും പരിസ്ഥിതി സൗഹൃദവുമായ കൃഷി
പൂർണ്ണമായും ശാസ്ത്രീയമായ രീതിയിലാണ് ഇവരുടെ മുന്നേറ്റം. മണ്ണിലെ ജൈവാംശം നിലനിർത്താൻ ട്രൈകോഡർമ കൾച്ചർ ചെയ്ത ജൈവവളങ്ങളും ഡൈഞ്ച കൃഷിയും (ചണമ്പ്) ഉപയോഗിക്കുന്നു.വന്യമൃഗ ശല്യം തടയാൻ സോളാർ ഫെൻസിംഗും,കീടങ്ങളെ അകറ്റാൻ സോളാർ ലൈറ്റ് ട്രാപ്പുകളും കൃഷിയിടത്തിൽ സ്ഥാപിച്ചിട്ടുണ്ട്. മികച്ച പരാഗണത്തിലൂടെ കൂടുതൽ വിളവ് ഉറപ്പാക്കാൻ തോട്ടങ്ങളിൽ തേനീച്ചക്കൂടുകളും ഒരുക്കിയിരിക്കുന്നു.ആലങ്കോട് കൃഷിഭവൻ, ബ്ലോക്ക് കൃഷിഭവൻ, എസ്.എച്ച്.എം (SHM) പദ്ധതി, ആത്മ (ATMA), ഫിഷറീസ് വകുപ്പ്, ആലങ്കോട് പഞ്ചായത്ത്,പെരുമ്പടപ്പ് ബ്ലോക്ക് പഞ്ചായത്ത്, സ്മാം (SMAM) പദ്ധതി എന്നിവയുടെ സഹായ സഹകരണങ്ങൾ ഈ വിജയത്തിന് പിന്നിലുണ്ടെന്നും സംഘം കൃതജ്ഞതയോടെ സ്മരിക്കുന്നു.അബ്ബാസ് എൻ.എം,സുഹൈർ എറവറാംകുന്ന് എന്നിവരുടെ നേതൃത്വത്തിൽ മൂസ ഇ.എം,സബാഹുസലാം ഇ.എം, ഉബൈദ്,ഇ.എം, ഷാഹിർ ബിൻഹമീദ്,ഫഹദ് ഇ.എച്ച്, ആസിഫ് ഇ.എ, അഷ്റഫ് ബിൻ മുഹമ്മദ്, അമീറാ സബാഹു, ഷൗക്കത്ത് ഇ.എച്ച് എന്നിവരാണ് ഈ വിജയഗാഥയ്ക്ക് പിന്നിൽ പ്രവർത്തിക്കുന്ന മറ്റ് അംഗങ്ങൾ
