പൊന്നാനി : ഫയർ ആൻഡ് റെസ്ക്യൂ സ്റ്റേഷനിലെ പഴയ ജലസംഭരണിക്ക് പകരം പുതിയത് നിർമിക്കാൻ സർക്കാർ 35 ലക്ഷം രൂപ അനുവദിച്ചു. കെ.പി. നൗഷാദലി എംഎൽഎയുടെ ഇടപെടലിനെ തുടർന്നാണ് നടപടി. ഒക്ടോബർ ആറിലെ ആഭ്യന്തര വകുപ്പ് ഉത്തരവിലാണ് ഭരണാനുമതി നൽകിയത്.
1974ൽ നിർമിച്ച ജലസംഭരണിയുടെ താങ്ങുകാലുകൾ ഉൾപ്പെടെ ദ്രവിച്ച് അപകടാവസ്ഥയിലായിട്ട് 15 വർഷത്തോളമായി. അഗ്നിശമന വാഹനങ്ങളിൽ വെള്ളം നിറയ്ക്കാൻ ഉപയോഗിക്കുന്ന സംഭരണി തകർച്ചാഭീഷണിയിലായതോടെയാണ് പുനർനിർമാണത്തിന് തുക അനുവദിച്ചത്.
2026–27 സാമ്പത്തിക വർഷത്തിനുള്ളിൽ നിർമാണം പൂർത്തിയാക്കണമെന്നാണ് സർക്കാർ നിർദേശം. അഗ്നിരക്ഷാ സേനാ ഡയറക്ടർ ജനറലിനാണ് നിർവഹണ ചുമതല.
