തിരുവനന്തപുരം: കെഎസ്ആർടിസിയുടെ സൗജന്യ യാത്രാ പദ്ധതിയായ പ്രിയദർശിനി നടപ്പാക്കിയതോടെ സ്വകാര്യ ബസ് ജീവനക്കാർ ദുരിതത്തിലാണെന്ന നിരവധി റിപ്പോർട്ടുകൾ പുറത്തുവന്നിരുന്നു. വരുമാനമാർഗം നിലച്ചതോടെ നിരവധി സ്വകാര്യ ബസുകൾ സർവീസുകൾ അവസാനിപ്പിക്കുകയും ചെയ്തിരുന്നു. ഇപ്പോഴിതാ സ്വകാര്യ ബസുകൾക്ക് ടിക്കറ്റ് ഇതര വരുമാനം കണ്ടെത്തുന്നതിനുള്ള വഴിയൊരുക്കിയിരിക്കുകയാണ് സർക്കാർ.
സ്വകാര്യ ബസുകളിൽ പരസ്യം നൽകാനുള്ള അനുമതി നൽകുന്നതായി ഗതാഗത വകുപ്പ് മന്ത്രി സി പി ജോൺ അറിയിച്ചു. ബസുകളുടെ പുറത്തും അകത്തും പരസ്യങ്ങൾ പതിക്കുന്നതിനുള്ള അനുമതിയാണ് നൽകുന്നത്. തീരുമാനത്തെ സ്വകാര്യ ബസുടമകൾ സ്വാഗതം ചെയ്തിട്ടുണ്ട്. സ്വകാര്യ ബസുടമകൾ ഉന്നയിച്ചിരിക്കുന്ന പ്രശ്നങ്ങൾ പരിഹരിക്കാൻ കേരളസർക്കാർ ഗതാഗതനയം നടപ്പാക്കുമെന്നും മന്ത്രി ഉറപ്പുനൽകി. കെഎസ്ആർടിസി ബസുകളിൽ പരസ്യം പതിക്കുന്നതിന് അനുമതിയുണ്ട്. എന്നാൽ സ്വകാര്യ ബസുകൾക്ക് ഇതാദ്യമായാണ് പരസ്യം പതിക്കാൻ അനുമതി നൽകുന്നത്.
പ്രിയദർശിനി സർക്കാർ പദ്ധതിയാണ്. അത് നടപ്പാക്കിയതുമായി ബന്ധപ്പെട്ട് ഉണ്ടായിട്ടുള്ള നിക്ഷേപകരുടെ പ്രശ്നങ്ങൾ വളരെ സൂക്ഷ്മമായി വിലയിരുത്തുന്നതിനും ഏതൊക്കെ മേഖലയിലാണ് ഇത് ബാധിച്ചിരിക്കുന്നതെന്നും പഠിക്കുന്നതിനായി ബി. പത്മകുമാർ ചെയർമാനും ഡോ. ശ്രീദേവി വൈസ് ചെയർപേഴ്സണുമായിട്ടുള്ള കമ്മിറ്റി രൂപീകരിച്ചിട്ടുണ്ട്. 45 ദിവസത്തിനുള്ളിൽ റിപ്പോർട്ട് ലഭിക്കുമെന്നും മന്ത്രി പറഞ്ഞു.
