ചങ്ങരംകുളം:പ്രായപൂര്‍ത്തിയാവാത്ത വിദ്യാര്‍ത്ഥികള്‍ക്ക് കള്ള് വില്‍പന നടത്തിവന്ന കള്ള്ഷാപ്പ് ജീവനക്കാരനെ ചങ്ങരംകുളം പോലീസ് അറസ്റ്റ് ചെയ്തു.ചങ്ങരംകുളം കോക്കൂരില്‍ പ്രവര്‍ത്തിച്ച് വന്ന കള്ള് ഷാപ്പ് ജീവനക്കാരനായ കടവല്ലൂര്‍ സ്വദേശി കുന്നത്ത് ഞാലില്‍ സജീവ് (60) നെയാണ് ചങ്ങരംകുളം എസ്ഐ നസിയ എം സാഹിബ്,എസ്ഐ ശ്രീലേഷ് എന്നിവരുടെ നേതൃത്വത്തിലുള്ള അന്വേഷണസംഘം അറസ്റ്റ് ചെയ്തത്.
ശനിയാഴ്ച രാത്രിയോടെയാണ് സംഭവം.ഓപ്പറേഷന്‍ തൂഫാന്‍ പരിശോധനയുടെ ഭാഗമായി ചങ്ങരംകുളം പോലീസ് നടത്തിയ പരിശോധനയിലാണ് കോക്കൂരില്‍ നിന്ന് മദ്യപിച്ച നിലയില്‍ 9 ഓളം വിദ്യാര്‍ത്ഥികളെ പോലീസ് പിടികൂടിയത്.വിദ്യാര്‍ത്ഥികളെ ചോദ്യം ചെയ്തതോടെയാണ് സമീപത്തെ കള്ള് ഷാപ്പില്‍ നിന്ന് കള്ള് കുടിച്ചതാണെന്നും സ്ഥിരമായി കള്ള് കുടിക്കാറുണ്ടെന്നും വിദ്യാര്‍ത്ഥികള്‍ മൊഴി നല്‍കിയത്.സംഭവം അറിഞ്ഞ ഉടനെ തന്നെ കള്ള് ഷാപ്പിലെത്തി ജീവനക്കാരനെ കസ്റ്റഡിയില്‍ എടുക്കുകയായിരുന്നു.കസ്റ്റഡിയില്‍ എടുത്ത് ചോദ്യം ചെയ്തതോടെ ഇയാള്‍ കുറ്റം സമ്മതിക്കുകയും ചെയ്തു.സംഭവത്തില്‍ കള്ള്ഷാപ്പ് ഉടമക്ക് എതിരെയും കേസെടുക്കുമെന്ന് ഉദ്ധ്യോഗസ്ഥര്‍ പറഞ്ഞു.അറസ്റ്റിലായ സജീവനെതിരെ ജാമ്യമില്ലാത്ത വകുപ്പ് ചുമത്തിയാണ് പോലീസ് കേസെടുത്തിരിക്കുന്നത്
