ചങ്ങരംകുളം: കഴിഞ്ഞ ആറു വർഷക്കാലമായി നന്മയ്ക്കും ആലംകോട്, നന്നംമുക്ക് ഗ്രാമപഞ്ചായത്ത് പരിധിയിലെ കലാ-സാംസ്കാരിക-ജീവകാരുണ്യ പ്രവർത്തനങ്ങൾക്കും നേതൃത്വം നൽകുന്ന മാനവം സാംസ്കാരിക കൂട്ടായ്മ എസ്.എസ്.എൽ.സി., സി.ബി.എസ്.ഇ., പ്ലസ് ടു, എൽ എസ് എസ്, യു എസ് എസ് പരീക്ഷകളിൽ മികച്ച വിജയം നേടിയ വിദ്യാർഥികളെയും വിവിധ മേഖലകളിൽ മികവ് തെളിയിച്ച ആളുകളെയും ആദരിക്കുന്ന ‘വിജയോത്സവം 2026’ ജൂൺ 27-ന് ഉച്ചയ്ക്ക് 1.30ന് ചങ്ങരംകുളം സ്നേഹ ഓഡിറ്റോറിയത്തിൽ സംഘടിപ്പിക്കുന്നു.
ചടങ്ങിന്റെ ഭാഗമായി വിദ്യാഭ്യാസ വിദഗ്ധനും ഫാറൂഖ് ട്രെയിനിങ് കോളേജിലെ അസിസ്റ്റന്റ് പ്രൊഫസറുമായ ഡോ. കെ. എം. ഷെരീഫ് വിദ്യാർഥികൾക്കും രക്ഷിതാക്കൾക്കുമായി പ്രചോദനാത്മക മോട്ടിവേഷൻ ക്ലാസ് നയിക്കും. പഠനമികവും വ്യക്തിത്വവികസനവും ലക്ഷ്യമിട്ടുള്ള ക്ലാസിൽ വിദ്യാർഥികൾക്കും രക്ഷിതാക്കൾക്കും പ്രയോജനകരമായ വിഷയങ്ങൾ അവതരിപ്പിക്കും.
ആലംകോട്,നന്നംമുക്ക് ഗ്രാമപഞ്ചായത്ത് പരിധിയിലെ എസ്.എസ്.എൽ.സി., സി.ബി.എസ്.ഇ., പ്ലസ് ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികളെയും വിവിധ മേഖലകളിൽ മികച്ച നേട്ടം കൈവരിച്ചവരെയും ചടങ്ങിൽ അനുമോദിക്കും.
മാനവം സാംസ്കാരിക കൂട്ടായ്മയുടെ സാമൂഹിക-മാനവിക ജീവകാരുണ്യ പ്രവർത്തനങ്ങളുടെ ഭാഗമായാണ് പരിപാടി സംഘടിപ്പിക്കുന്നത്. മുൻ എം എൽ എ പി. നന്തകുമാർ, മുൻ സ്പീക്കർ പി. ശ്രീരാമകൃഷ്ണൻ എന്നിവർ ചടങ്ങിൽ സംബന്ധിച്ച് ആശംസകൾ അർപ്പിക്കും.
ആലംകോട്, നന്നംമുക്ക് ഗ്രാമപഞ്ചായത്ത് പരിധിക്ക് അകത്തു ഉള്ള SSLC, PLUS TWO, CBSE , LSS, USS എന്നിവയിൽ മികച്ച വിജയം നേടിയ ഇതിൽ രജിസ്റ്റർ ചെയ്തവരും ഏതെങ്കിലും കാരണവശാൽ രജിസ്റ്റർ ചെയ്യാൻ സാധിക്കാത്തവരും രക്ഷിതാക്കളോടൊപ്പം സ്നേഹ ഓഡിറ്റോറിയത്തിൽ ഉച്ചക്ക് 1.30 മണിക്ക് തന്നെ റിപ്പോർട്ട് ചെയ്യണമെന്ന് സംഘടകർ അറിയിച്ചു.
