കൊച്ചി: അന്തരിച്ച നടൻ സലിം കുമാറിന്റെ വിയോഗത്തിൽ അനുശോചനം രേഖപ്പെടുത്തി കേന്ദ്ര മന്ത്രി സുരേഷ് ഗോപി. കൊച്ചിയിലെ അമൃത ആശുപത്രിയിലെത്തിയാണ് അദ്ദേഹം സലിം കുമാറിന് അന്തിമോപചാരം അർപ്പിച്ചത്. ഹാസ്യത്തിന് പുതിയ തിരക്കഥ എഴുതിയ അതുല്യപ്രതിഭയാണ് സലിം കുമാറെന്നും ഏറെ സ്നേഹം നിറഞ്ഞ വ്യക്തിയാണ് വേർപെട്ടുപോയതെന്നും സുരേഷ് ഗോപി അനുസ്മരിച്ചു.
എല്ലാ വേർപാടുകളും ദുഃഖം മാത്രം പകർന്നുനൽകുന്ന ഒന്നാണ്. വേർപെട്ടുപോകുന്നവർ ഹൃദയത്തിൽ സൂക്ഷിക്കുന്നവരാണെങ്കിൽ ആ വേദനയുടെ ആഘാതം വളരെ കൂടുതലായിരിക്കും. അങ്ങനെയൊരു വേർപാടാണ് സലിംകുമാറിന്റേത്. ഹാസ്യത്തിന്റെ രാജാക്കന്മാരിൽ നിന്നെല്ലാം വേറിട്ട ഭാവവും മുഖവുമുണ്ടായിരുന്ന, ചിരിക്ക് വേറിട്ട സ്ക്രിപ്റ്റ് എഴുതിയ അതുല്യപ്രതിഭയാണ് അദ്ദേഹം. അദ്ദേഹത്തിന്റെ രാഷ്ട്രീയവുമായി ചേർന്നു പോകുന്നതല്ല എന്റെ രാഷ്ട്രീയം. എങ്കിൽ പോലും അദ്ദേഹത്തിന്റെ രാഷ്ട്രീയത്തിലെ നേതാക്കളെക്കാൾ അദ്ദേഹം എന്നെ സ്നേഹിച്ചു. ആ ഒരു ബന്ധമാണ് അറ്റുപോയത്. അതിൽ ദുഃഖമുണ്ട്. നിത്യശാന്തിക്ക് വേണ്ടി പ്രാർഥിക്കുന്നു. അദ്ദേഹത്തിന്റെ കുടുംബത്തിലെ എല്ലാവർക്കും വേണ്ടി പ്രാർഥിക്കുന്നു, സുരേഷ് ഗോപി പറഞ്ഞു.
