“മൂന്നാം തവണയും ഇടതുസർക്കാർ അധികാരത്തിൽ വരും ”മുഖ്യമന്ത്രി പിണറായി വിജയൻ

എടപ്പാൾ:മൂന്നാം തവണയും ഇടതുസർക്കാർ അധികാരത്തിൽ വരുമെന്ന് മുഖ്യമന്ത്രി പിണറായി വിജയൻ.തവനൂർ മണ്ഡലം എൽഡിഎഫ് സ്ഥാനാർഥി ഡോ. കെ.ടി. ജലീലിന്റെ തെരഞ്ഞെടുപ്പ് പ്രചാരണാർത്ഥം എടപ്പാളിൽ സംഘടിപ്പിച്ച എൽഡിഎഫ് റാലിയിൽ സംസാരിക്കുകയായിരുന്നു പിണറായി വിജയൻ.എടപ്പാള്‍ ഗോവിന്ദ തിയേറ്ററിന് സമീപം നടന്ന പരിപാടിയിൽ ആയിരങ്ങൾ ആവേശത്തോടെ പങ്കാളികളായി.വികസനവും ജനക്ഷേമവും കരുതലും ഉറപ്പാക്കിയാണ് ഇടതുസർക്കാർ അധികാരത്തിൽ തുടരാന്‍ വോട്ട് തേടുന്നതെന്നും തുടര്‍ഭരണം ജനങ്ങളുടെ ഉറച്ച തീരുമാനമാണെന്നും അദ്ദേഹം കൂട്ടിച്ചേർത്തു. വർഗീയ ഫാസിസ്റ്റ് ശക്തികൾക്കെതിരെ ശക്തമായ പ്രതിരോധം തീർക്കുന്ന ഇടതുപക്ഷം കേരളത്തിന്റെ രക്ഷയാണെന്നും മുഖ്യമന്ത്രി വ്യക്തമാക്കി.സി.പി.ഐ ജില്ലാ കമ്മിറ്റി അംഗം കെ.എൻ. ഉദയൻ അധ്യക്ഷനായ പരിപാടിയിൽ ഡോ. കെ.ടി. ജലീൽ, വി.പി. സാനു, വി.പി. അനിൽ, കൂട്ടായി ബഷീർ,കെ.പി. ശങ്കരൻ, ബാബു മംഗലം തുടങ്ങിയവർ പങ്കെടുത്തു.പി.ജ്യോതിഭാസ് സ്വാഗതവും സി. രാമകൃഷ്ണൻ നന്ദിയും അറിയിച്ചു.മുഖ്യമന്ത്രി മണ്ഡലത്തിലെത്തിയത് പ്രചാരണത്തിന് പുതുവൈഭവം നൽകി പ്രവർത്തകരുടെ ആവേശം ഉയർത്തിയതായി നേതാക്കൾ അറിയിച്ചു.