ഇരുചക്രവാഹനങ്ങള് തന്ത്രപരമായി മോഷ്ടിച്ച ശേഷം, പാർട്സുകളാക്കി വില്ക്കുന്ന യുവാവ് പിടിയില്. തൃശൂര് മേലൂർ ശാന്തിപുരം നിലപ്പന വീട്ടിൽ ലിബിൻ (34) ആണ് കൊരട്ടി പൊലീസിന്റെ പിടിയിലായത്. മോഷ്ടിച്ച ബൈക്കുകള് പാർട്സുകളാക്കി വീടിന്റെ ടെറസിലാണ് ഇവന് സൂക്ഷിച്ചിരുന്നത്.
പ്രതിയുടെ വീടിന്റെ ടെറസിൽ നിന്ന് നിരവധി വാഹനങ്ങളുടെ നമ്പർ പ്ലേറ്റുകൾ പൊലീസ് കണ്ടെടുത്തു. പൊലീസ് പട്രോളിംഗിനിടെ സംശയാസ്പദമായ സാഹചര്യത്തിലാണ് ലിബിനെ കണ്ടെത്തിയത്. തുടര്ന്ന് ഇയാളെ പൊലീസ് ചോദ്യം ചെയ്തതോടെയാണ് ബൈക്ക് മോഷണ വിവരം പുറത്തായത്. ബൈക്ക് മോഷണവുമായി ബന്ധപ്പെട്ട് വന്ന പരാതികള് പരിശോധിച്ചതോടെ, നിരവധി വാഹനങ്ങള് ഇവന് അടിച്ചുമാറ്റിയതാണെന്ന് ബോധ്യപ്പെട്ടു. കൊരട്ടിയിൽ നിന്നും കാതിക്കുടം സ്വദേശിയുടെ ബൈക്ക് മോഷ്ടിച്ചത് ഇയാളാണെന്ന് പൊലീസ് സ്ഥിരീകരിച്ചിട്ടുണ്ട്.
കൊരട്ടിയിലെ മോഷണത്തിന് പുറമേ ചാലക്കുടി, അങ്കമാലി എന്നിവിടങ്ങളിൽ മോഷണം നടത്തിയിട്ടുണ്ടെന്നും കണ്ടെത്തി. സി.ഐ അമൃത രംഗൻ, എസ്.ഐമാരായ ഒ.ജി.ഷാജു, എൻ.എസ്. റെജിമോൻ എന്നിവർ ചേർന്നാണ് പ്രതിയെ പിടികൂടിയത്.
