ചങ്ങരംകുളം:ഓണ്ലൈന് ആപ്പില് നിന്ന് ലോണ് എടുക്കാന് ശ്രമിച്ച യുവാവിന്റെ മോബൈല് ഹാക്ക് ചെയ്ത് എക്കൗണ്ടില് നിന്ന് പണം തട്ടാന് ശ്രമം.കഴിഞ്ഞ ദിവസമാണ് മൂക്കുതല സ്വദേശിയായ യുവാവിനെ ലോണ് ആപ് തട്ടിപ്പ് സംഘം കെണിയില് പെടുത്തിയത്.മൊബൈല് ഹാക്ക് ചെയ്ത് ഫോട്ടോ മോര്ഫ് ചെയ്ത് പ്രചരിപ്പിക്കുമെന്ന് ഭീഷണിപ്പെടുത്തി എക്കൗണ്ടിലുണ്ടായിരുന്ന 2 ലക്ഷത്തോളം രൂപയും തട്ടിയെടുക്കാനും ശ്രമം നടന്നു.എക്കൗണ്ട് ഹാക്ക് ചെയ്ത് പിന്വലിക്കാന് ശ്രമിച്ച 2 ലക്ഷത്തോളം രൂപ ചങ്ങരംകുളം പോലീസിന്റെയും സൈബര് സെക്യൂരിറ്റി ടീമിന്റെയും സഹായത്തോടെ തിരിച്ചെടുക്കുകയായിരുന്നു.
മൊബൈലില് ലോണ് ആപ് ഇന്സ്റ്റാള് ചെയ്ത് പണം എടുക്കാന് ശ്രമിച്ചെങ്കിലും യുവാവിന് പണം എടുക്കാന് കഴിഞ്ഞില്ല.പിന്നീട് ശ്രമം ഉപേക്ഷിച്ചിരുന്നു.എന്നാല് ഇതിനോടകം തട്ടിപ്പ് സംഘം യുവാവിന്റെ എക്കൗണ്ട് വിവരങ്ങള് ചോര്ത്തിയെടുക്കുകയും മൊബൈല് പൂര്ണ്ണമായും ഹാക്ക് ചെയ്യുകയും ചെയ്തിരുന്നു.പിന്നീട് യുവാവിനെ ഭീഷണിപ്പെടുത്തുകയായിരുന്നു.പിന്നീട് എക്കൗണ്ട് പരിശോധിച്ചപ്പോഴാണ് തന്റെ എക്കൗണ്ടില് മുമ്പ് ബാലന്സ് ഉണ്ടായിരുന്ന പണം തട്ടിപ്പ് സംഘം ട്രാന്സര് ചെയ്യാന് ശ്രമിച്ചതായി കണ്ടെത്തിയത്.പരിഭ്രാന്തനായ യുവാവ് ചങ്ങരംകുളം പോലീസില് പരാതി നല്കുകയായിരുന്നു.ചങ്ങരംകുളം പോലീസും സൈബര് സെക്യൂരിറ്റി സെക്ഷനില് ജോലി ചെയ്യുന്ന ചിയ്യാനൂര് സ്വദേശിയായ ഫഹദിന്റെയും അവസരോചിതമായ ഇടപെടലില് രണ്ട് പമണിക്കൂറോളം നീണ്ട പരിശ്രമത്തിനൊടുവില് യുവാവിന്റെ പണം തട്ടിപ്പ് സംഘത്തില് നിന്ന് തിരിച്ചെടുക്കുകയും ചെയ്തു.ഉത്തരേന്ത്യ കേന്ദ്രീകരിച്ച് പ്രവര്ത്തിക്കുന്ന ലോണ് ആപ്പ് തട്ടിപ്പ് സംഘമാണ് പിന്നിലെന്നും ഇത്തരം തട്ടിപ്പില് വീഴാതിരിക്കാന് ശ്രമിക്കണമെന്നും പോലീസ് മുന്നറിയിപ്പ് നല്കി
