കോഴിക്കോട്: 78-ാമത് സന്തോഷ് ട്രോഫി ഫുട്ബോൾ ചാമ്പ്യൻഷിപ്പിനുള്ള കേരളാ ടീമിനെ പ്രഖ്യാപിച്ചു. 22 അംഗ ടീമിനെയാണ് പ്രഖ്യാപിച്ചത്. എറണാകുളത്തിന്റെ ജി. സഞ്ജു ക്യാപ്റ്റനും ഗോൾകീപ്പർ എസ്. ഹജ്മൽ വൈസ് ക്യാപ്റ്റനുമാണ്. ടീമിൽ 15 പുതുമുഖങ്ങളുണ്ട്. കഴിഞ്ഞ സന്തോഷ് ട്രോഫി കളിച്ച അഞ്ച് താരങ്ങൾ ടീമിലുണ്ട്. പയ്യനാട് സന്തോഷ് ട്രോഫിയിൽ കർണാടക ടീമിന്റെ പരിശീലകനായിരുന്ന ബിബി തോമസ് മുട്ടത്താണ് പരിശീലകൻ.
സൂപ്പർ ലീഗ് കേരളയിൽ തിളങ്ങിയ പത്തോളം പേർ ടീമിൽ ഇടംപിടിച്ചു. മലപ്പുറത്തുനിന്നുള്ള പതിനേഴുകാരൻ മുഹമ്മദ് റിഷാദ് ഗഫൂറാണ് ടീമിലെ ഏറ്റവും പ്രായംകുറഞ്ഞ താരം. സൂപ്പർ ലീഗ് കേരളയിലെ മികച്ച പ്രകടനമാണ് റിഷാദിനെ ടീമിലെത്തിച്ചത്. ഗ്രൂപ്പ് എച്ചിൽ റെയിൽവേ, ലക്ഷദ്വീപ്, പോണ്ടിച്ചേരി ടീമുകൾക്കൊപ്പമാണ് കേരളം. നവംബർ 20-ന് കോഴിക്കോട് കോർപറേഷൻ സ്റ്റേഡിയത്തിൽ റെയിൽവേസുമായാണ് കേരളത്തിന്റെ ആദ്യമത്സരം. 22-ന് നടക്കുന്ന രണ്ടാം മത്സരത്തിൽ ലക്ഷദ്വീപ് ആണ് എതിരാളികൾ. നവംബർ 24 പോണ്ടിച്ചേരിയെ നേരിടും.
ആക്രമണ ശൈലിയിലുള്ള കളി രീതിയായിരിക്കും അവലംബിക്കുകയെന്ന് പരിശീലകൻ ബിബി തോമസ് പറഞ്ഞു. കിരീടം നേടാൻ പ്രാപ്തിയുളള ടീമാണ് ഇതെന്ന് ക്യാപ്റ്റൻ സഞ്ജുവും പറഞ്ഞു. സഞ്ജുവിന്റെ അഞ്ചാമത്തെ സന്തോഷ് ട്രോഫി മത്സരമാണ് ഇത്
ഗോൾകീപ്പർമാർ: കെ. മുഹമ്മദ് നിയാസ്, എസ്. ഹജ്മൽ (വൈസ് ക്യാപ്റ്റൻ), കെ. മുഹമ്മദ് അസ്ഹർ.
ഡിഫൻഡർമാർ: എം. മനോജ്, ജി.സഞ്ജു (ക്യാപ്റ്റൻ), മുഹമ്മദ് അസ്ലം, ആദിൽ അമൽ, പി.ടി. മുഹമ്മദ് റിയാസ്, ജോസഫ് ജസ്റ്റിൻ
മിഡ്ഫീൽഡർമാർ:വി.അർജുൻ, ക്രിസ്റ്റി ഡേവിസ്, മുഹമ്മദ് അർഷഫ്, നസീബ് റഹ്മാൻ, സൽമാൻ കള്ളിയത്ത്, നിജോ ഗിൽബർട്ട്, മുഹമ്മദ് റിഷാദ് ഗഫൂർ, പി.പി. മുഹമ്മദ് റൊഷാൽ, മുഹമ്മദ് മുഷ്റഫ്.
മുന്നേറ്റം: ഗനി നിഗം, മുഹമ്മദ് അജ്സൽ, ഇ. സജീഷ്, ടി. ഷിജിൻ.
മുഖ്യപരിശീലകൻ:ബിബി തോമസ് മുട്ടത്ത്
സഹപരിശീലകൻ:സി. ഹാരി ബെന്നി
ഗോൾകീപ്പിങ് പരിശീലകൻ:എം.വി. നെൽസൺ
ടീം ഫിസിയോ:ജോസ് ലാൽ
മാനേജർ:അഷ്റഫ് ഉപ്പള.
