കഞ്ചാവെന്ന് പറഞ്ഞ് ​ഗ്രീൻ ടീ നൽകി കബളിപ്പിച്ച യുവാക്കളെ ഗുണ്ടാസംഘം മർദിച്ചതായി പരാതി

എറണാകുളം: കഞ്ചാവെന്ന് പറഞ്ഞ് ​ഗ്രീൻ ടീ നൽകി കബളിപ്പിക്കാൻ ശ്രമിച്ച യുവാക്കളെ ​ഗുണ്ടാസംഘം മർദിച്ചതായി പരാതി. ചാവക്കാട് സ്വദേശികളായ രണ്ട് യുവാക്കളെയാണ് തൃപ്പൂണിത്തറയിലുള്ള ​ഗുണ്ടാസംഘം മർദിച്ചത്. സംഘത്തിലെ രണ്ടു പേരെ പൊലീസ് പിടികൂടി.നിരവധി ക്രിമിനൽ കേസുകളിലെ പ്രതിയായ ദേവദത്തൻ സുഹൃത്തായ അമ്പാടി, അർജുൻ, കാളിദാസൻ എന്നിവരാണ് കഞ്ചാവ് അന്വേഷിച്ച് യുവാക്കളെ ബന്ധപ്പെട്ടത്. തുടർന്ന്, യുവാക്കൾ ക‍ഞ്ചാവുമായി കലൂരിൽ എത്താമെന്നാണ് അറിയിച്ചത്. രാത്രി 11 മണിയോടെ ഇവിടെയെത്തിയ ദേവദത്തനും സംഘത്തിനും യുവാക്കൾ കഞ്ചാവ് പാക്കറ്റ് കൈമാറി.ഇതിനിടയിൽ ദേവദത്തന്റെ സംഘത്തിലൊരാൾ പാക്കറ്റ് പരിശോധിച്ചപ്പോഴാണ് ഉള്ളിലുള്ളത് ​ഗ്രീൻ ടീ ആണെന്ന് മനസിലായത്. ഇതോടെ യുവാക്കളെ ബലമായി കാറിലേക്ക് വലിച്ചു കയറ്റി ​ഗുണ്ടാസംഘം മർദിച്ചെന്നാണ് പരാതിയിൽ പറയുന്നത്. തുടർന്ന്, ഇളംകുളത്ത് യുവാക്കളെ ഇറക്കിവിട്ടു. മർദനമേറ്റ യുവാക്കൾ പൊലീസ് സ്റ്റേഷനിലെത്തി പരാതി നൽകിയെങ്കിലും യഥാർത്ഥ കാരണം പൊലീസിൽ അറിയിച്ചില്ല. കേസിൽ രണ്ടു പ്രതികളെ പിടികൂടിയതോടെയാണ് യഥാർത്ഥ സംഭവം പുറത്തറിഞ്ഞത്. പാർടൈം ജോലി ചെയ്ത് ജീവിക്കുന്നവരാണ് യുവാക്കൾ‌.