വീടിന് സമീപം വച്ച് കാട്ടാന ആക്രമിച്ചു; ഗൂഡല്ലൂരിൽ ഒരാൾ മരിച്ചു

ഗൂഡല്ലൂർ:ബിതർക്കാടിനടുത്ത് കർഷകനെ കാട്ടാന ആക്രമിച്ച് കൊലപ്പെടുത്തി. ബിതർക്കാട് വനം ഓഫിസിനു സമീപമുള്ള ചന്ദകുന്നിലെ ജോയി (60) ആണു മരിച്ചത്. ഇന്നലെ രാത്രി 8 മണിയോടെ വീട്ടിലേക്കു പോകുമ്പോൾ വീടിനു സമീപമുള്ള കാപ്പിത്തോട്ടത്തിൽ വച്ച് കാട്ടാന ആക്രമിക്കുകയായിരുന്നു.വീട്ടിൽ നിന്നും 100 മീറ്റർ ദൂരത്തിലാണു കാട്ടാനയുടെ ആക്രമണം ഉണ്ടായത്. ബഹളം കേട്ട് നാട്ടുകാരെത്തി ജോയിയെ പന്തല്ലൂർ താലൂക്ക് ആശുപത്രിയിലേക്കു കൊണ്ടുപോയെങ്കിലും ആശുപത്രിയിലെത്തും മുൻപേ മരിച്ചു. ഭാര്യ: ശോശാമ്മ. മക്കൾ: അലൻ, അലീന.