അച്ഛൻ തള്ളിമാറ്റിയ കാർ ഒന്നര വയസുകാരിയുടെ ദേഹത്തേക്ക് മറിഞ്ഞു; ദാരുണാന്ത്യം

കാസർകോട്: തള്ളിമാറ്റുന്നതിനിടെ നിയന്ത്രണംവിട്ട് മറിഞ്ഞ കാറിനടിയിൽപ്പെട്ട് രണ്ട് വയസുകാരി മരിച്ചു. മുള്ളേരിയ ബെള്ളിഗയിലെ എം ഹരിദാസിന്റെയും ശ്രീവിദ്യയുടെയും മകൾ ഹൃദ്യനന്ദയാണ് മരിച്ചത്. ഇന്നലെ വൈകിട്ട് ആറ് മണിയോടെയാണ് അപകടമുണ്ടായത്. സ്റ്രാർട്ടാകാതിരുന്ന കാർ തള്ളി മുന്നോട്ട് നീക്കുന്നതിനിടെ കുഞ്ഞ് കാറിനടിയിൽപ്പെടുകയും ശ്രീവിദ്യ തെറിച്ച് വീഴുകയുമായിരുന്നു. ശ്രീവിദ്യ പരിക്കേൽക്കാതെ രക്ഷപ്പെട്ടു. ബന്ധുവിന്റെ ഗൃഹപ്രവേശന ചടങ്ങിന് ശേഷം വീട്ടിലേക്ക് മടങ്ങുകയായിരുന്നു കുടുംബം.മുള്ളേരിയ – കുമ്പള കെഎസ്‌ടിപി റോഡിൽ ബെള്ളിഗെയിൽ നിന്ന് 200 മീറ്റർ താഴെയാണ് ഹരിദാസിന്റെ വീട്. കാറ് വീട്ടിലേക്ക് ഇറക്കുന്നതിനിടെ മഴവെള്ളം ഒഴുകിപ്പോകാൻ ഉണ്ടാക്കിയ ചാലിൽ ടയർ കുടുങ്ങി എഞ്ചിൻ ഓഫായി. വീട് തൊട്ടടുത്തായതിനാൽ ശ്രീവിദ്യ ഇളയ മകളെയും എടുത്ത് ഇറങ്ങിനടന്നു. മൂത്തമകൾ ദേവനന്ദ കാറിനുള്ളിലായിരുന്നു.കാർ കുഴിയിൽ നിന്ന് പുറത്തിറക്കാനായി ഹരിദാസ് പുറത്തിറങ്ങി തള്ളുന്നതിനിടെ ഇറക്കത്തിലേക്ക് നീങ്ങി വശത്തെ ഭിത്തിയിൽ ഇടിച്ച് ഇളയ കുട്ടിയുടെ ദേഹത്തേക്ക് മറിയുകയായിരുന്നു. മൂത്ത കുട്ടി നിസാര പരിക്കുകളോടെ രക്ഷപ്പെട്ടു. ഹൃദ്യനന്ദയെ ഉടൻതന്നെ മുള്ളേരിയ സഹകരണ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം കാസർകോട് ജനറൽ ആശുപത്രി മോർച്ചറിയിലേക്ക് മാറ്റി.