അന്തസ്സംസ്ഥാന കള്ളനോട്ട് കേസിലെ പ്രതിയായ തിരുനെൽവേലി സ്വദേശി സഞ്ജയ് വർമയെ തമ്പാനൂർ പോലീസ് പിടികൂടി. കന്യാകുമാരിയിലെ ഹോട്ടലിൽനിന്നാണ് ഇയാൾ പിടിയിലായത്. ഹോമിയോ ഡോക്ടർ എന്ന വ്യാജേന വിവിധ പേരുകളിൽ ഇന്ത്യയിലെ വിവിധ ആഡംബര ഹോട്ടലുകളിൽ താമസിച്ച് കള്ളനോട്ടുകൾ മാറിയെടുക്കുന്നതാണ് രീതി
തമ്പാനൂരും കഴക്കൂട്ടത്തും എറണാകുളത്ത് പലയിടങ്ങളിലും കള്ളനോട്ടുകൾ നൽകി ആൾക്കാരെ കബളിപ്പിച്ചിട്ടുണ്ട്. ചെന്നൈ, തിരുനെൽവേലി എന്നിവിടങ്ങളിൽനിന്നാണ് ഇയാൾക്ക് കള്ളനോട്ടുകൾ ലഭിക്കുന്നത്. ടാക്സി ഡ്രൈവർമാരാണ് പ്രധാന ഇരകൾ.
വൻകിട ഹോട്ടലുകളിൽ താമസിച്ച് യാത്രയ്ക്കായി ഓൺലൈൻ ടാക്സികൾ വിളിച്ച് ഡ്രൈവർമാരോട് ഇതേ സ്ഥലത്തുവെച്ചു പരിചയപ്പെട്ട മറ്റു ചില ആൾക്കാരുടെ ഗൂഗിൾ പേ നമ്പറിലേക്ക് വിവിധ ആവശ്യങ്ങൾ പറഞ്ഞ് പണം അയപ്പിക്കും. പകരം കള്ളനോട്ടുകൾ നൽകുകയാണ് പതിവ്. സമാന കേസിൽ ഇയാളെ 2022-ൽ തലശ്ശേരി പോലീസ് അറസ്റ്റു ചെയ്തിരുന്നു
