മമ്മൂട്ടി ‘ഔട്ട്’, മോഹൻലാലിനെ വെട്ടി ആ 4.32 മില്യൺ പടം; ആറ് ദിനത്തിൽ ഞെട്ടിച്ച് തുടരും, ബുക്കിം​ഗ് കണക്ക്

ഒരു സിനിമ റിലീസ് ചെയ്യുക അതിന് മികച്ച പ്രതികരണവും ബുക്കിങ്ങും ലഭിക്കുക എന്നത് ഏതൊരു സിനിമാക്കാരന്റെയും ആ​ഗ്രഹമാണ്. ഒരു സിനിമയുടെ കളക്ഷൻ പോക്ക് എങ്ങോട്ടാണെന്ന ഏകദേശ ധാരണ ലഭിക്കുന്നത് ബുക്കിങ്ങിലൂടെയാണ്. വിവിധ ബുക്കിം​ഗ് ആപ്പുകളിൽ നിന്നും മാത്രം ലഭിക്കുന്ന വിവരം അനുസരിച്ചാണ് ട്രാക്കർമാർ ഓരോ ദിവസത്തെയും കളക്ഷനുകളുടെ ഏകദേശ വിവരം നൽകുന്നതും. പ്രത്യേകിച്ച് ബുക്ക് മൈ ഷോയിലൂടെ. അത്തരത്തിൽ ബുക്ക് മൈ ഷോയിലൂടെ ഏറ്റവും കൂടുതൽ ടിക്കറ്റുകൾ വിറ്റ് പോയ മലയാള സിനിമകളുടെ ലിസ്റ്റ് പുറത്തുവന്നിരിക്കുകയാണ് ഇപ്പോൾ. ലിസ്റ്റിൽ ഒന്നാമതുള്ളത് മലയാളത്തിന് ആദ്യത്തെ 200 കോടി കളക്ഷൻ സമ്മാനിച്ച മഞ്ഞുമ്മൽ ബോയ്സ് ആണ്. 4.32 മില്യണാണ് ചിത്രത്തിന്റേതായി ബുക്ക് മൈ ഷോയിലൂടെ വിറ്റുപോയതെന്ന് സൗത്ത് ഇന്ത്യൻ ബോക്സ് ഓഫീസ് റിപ്പോർട്ട് ചെയ്യുന്നു. ഇന്റസ്ട്രി ഹിറ്റായ മാറിയ എമ്പുരാനെ കടത്തിവെട്ടിയാണ് മഞ്ഞുമ്മൽ ബോയ്സ് ഈ നേട്ടം കൊയ്തത് എന്നത് ഏറെ ശ്രദ്ധേയമാണ്. പത്താം സ്ഥാനത്ത് 1.6 മില്യണുമായി മോഹൻലാൽ ചിത്രം നേര് ആണ്. വെറും ആറ് ദിവസം കൊണ്ട് തുടരും ആറാം സ്ഥാനത്ത് എത്തിയിട്ടുണ്ട്. 2.15 മില്യൺ ആണ് തുടരുവിന്റേതായി ബുക്ക് മൈ ഷോയിലൂടെ ഇതുവരെ വിറ്റഴിഞ്ഞിരിക്കുന്ന ടിക്കറ്റുകൾ. വരും ദിവസങ്ങളിൽ പ്രേമലു, ആവേശം, ആടുജീവിതം അടക്കമുള്ള സിനിമകളുടെ ടിക്കറ്റ് വിൽപ്പനകളെ തുടരും പിന്നിലാക്കുമെന്നാണ് വിലയിരുത്തലുകൾ.