പറമ്പിൽ കളിച്ചുകൊണ്ടിരിക്കെ ആൾമറയില്ലാത്ത കിണറ്റിൽ വീണ് അഞ്ചുവയസ്സുകാരന് ദാരുണാന്ത്യം. വടകര മണിയൂർ കരുവഞ്ചേരിയിലാണ് സംഭവം. നിവാൻ എന്ന അഞ്ചുവയസ്സുകാരനാണ് മരിച്ചത്. കിണറ്റിൽവീണ മറ്റൊരു കുട്ടിയെ നാട്ടുകാർ രക്ഷപ്പെടുത്തി.
ശനിയാഴ്ച വൈകിട്ട് നാലരയോടെയായിരുന്നു അപകടം. വീടിനടുത്തുള്ള പറമ്പിൽ കളിക്കുന്നതിനിടെയാണ് രണ്ട് കുട്ടികൾ അബദ്ധത്തിൽ ആൾമറയില്ലാത്ത കിണറ്റിൽ വീണത്. ഓടിയെത്തിയ നാട്ടുകാർ രണ്ടുപേരെയും കരയ്ക്കെത്തിച്ചെങ്കിലും നിവാന്റെ ജീവൻ രക്ഷിക്കാനായില്ല
കിണറ്റിൽ വീണ രണ്ടാമത്തെ കുട്ടി പടവുകളിൽ പിടിച്ചുനിന്നതിനാലാണ് രക്ഷപ്പെട്ടത്. ഈ കുട്ടിയെ വടകര സഹകരണ ആശുപത്രിയിൽ പ്രവേശിപ്പിച്ചു. നിവാന്റെ മൃതദേഹം വടകര ജില്ലാ ആശുപത്രി മോർച്ചറിയിലേക്ക് മാറ്റി.
