ചേര്‍പ്പ്: വഴി കാണിച്ചുകൊടുത്തില്ലെന്നു പറഞ്ഞ് കാര്‍ യാത്രികരായ യുവാക്കള്‍ കേള്‍വിക്കുറവുള്ള വയോധികനെ ക്രൂരമായി മര്‍ദിച്ചു. ആക്രമണത്തില്‍ അരക്കെട്ടിലെ എല്ല് ഒടിഞ്ഞ പല്ലിശ്ശേരി കണ്‌ഠേശ്വരം കുന്നത്തുകാട്ടില്‍ മണി(74) മുളങ്കുന്നത്തുകാവ് മെഡിക്കല്‍ കോളേജില്‍ ചികിത്സയിലാണ്. ഞായറാഴ്ച രാത്രി എട്ടരയോടെ ഊരകം സെന്ററിലായിരുന്നു സംഭവം.കാറിലെത്തിയ യുവാക്കള്‍ ഇരിങ്ങാലക്കുട ഭാഗത്തേക്കുള്ള വഴി പെരുവനം പൂരത്തിനു പോകാനെത്തിയ മണിയോടു ചോദിക്കുകയായിരുന്നു. കേള്‍വിക്കുറവുള്ളതിനാല്‍ യുവാക്കള്‍ ചോദിച്ചത് മണി കേട്ടില്ല. ഇതില്‍ പ്രകോപിതരായ യുവാക്കള്‍ ബസ് സ്റ്റോപ്പിന്റെ ഉള്ളിലിട്ട് മണിയെ ക്രൂരമായി മര്‍ദിച്ചെന്ന് നാട്ടുകാര്‍ പറഞ്ഞു.
നാട്ടുകാര്‍ ഓടിയെത്തി യുവാക്കളെ പിടികൂടാന്‍ ശ്രമിച്ചെങ്കിലും നാട്ടുകാര്‍ക്ക് നേരേ കല്ലെറിഞ്ഞ് യുവാക്കള്‍ കാറുമായി രക്ഷപ്പെട്ടു.യുവാക്കളില്‍ ഒരാളുടെ മൊബൈല്‍ സ്ഥലത്ത് നഷ്ടപ്പെട്ടത് എടുക്കാന്‍ തിരിച്ചെത്തിയത് നാട്ടുകാരുടെ ശ്രദ്ധയില്‍പ്പെട്ടു. ഒരു കുപ്രസിദ്ധ ഗുണ്ടയുടെ ടീമംഗങ്ങളാണെന്നു പറഞ്ഞ് യുവാക്കള്‍ നാട്ടുകാരെ ഭീഷണിപ്പെടുത്തിയെന്നും പറയുന്നു. പഞ്ചായത്ത് വൈസ് പ്രസിഡന്റ് വി.എന്‍. സുരേഷ്, കോണ്‍ഗ്രസ് മുന്‍ മണ്ഡലം പ്രസിഡന്റ് ജോണ്‍ ആന്റണി തുടങ്ങിയവരും നാട്ടുകാര്‍ക്കൊപ്പം സ്ഥലത്ത് ഉണ്ടായിരുന്നു. കാറിന്റെ ചിത്രം മൊബൈലില്‍ പകര്‍ത്തി ഇവര്‍ പോലീസിന് കൈമാറി. പരാതി ഇതുവരെ ലഭിച്ചിട്ടില്ലെന്നും പരാതി ലഭിക്കുന്ന മുറയ്ക്ക് അന്വേഷണം നടത്തുമെന്നും ചേര്‍പ്പ് ഇന്‍സ്‌പെക്ടര്‍ പറഞ്ഞു.
