സ്വര്ണത്തരികളടങ്ങിയ മണ്ണ് വാഗ്ദാനം ചെയ്ത് അരക്കോടി രൂപ തട്ടിയ ഗുജറാത്ത് സംഘം കൊച്ചിയില് പിടിയില്. സൂറത്ത് സ്വദേശികളായ നാലംഗ സംഘത്തെയാണ് പാലാരിവട്ടം പൊലീസ് അറസ്റ്റു ചെയ്തത്.തമിഴ്നാട് സ്വദേശികളായ സ്വര്ണപ്പണിക്കാരെ കബളിപ്പിച്ച് 50 ലക്ഷം രൂപയും 36 ലക്ഷം രൂപയുടെ ചെക്കുകളുമാണ് സംഘം തട്ടിയെടുത്തത്.
ഗുജറാത്ത് സൂറത്ത് സ്വദേശികളായ സന്ദീപ് ഹസ്മുഖ്, വിപുള് മഞ്ചി, ധര്മേഷ്, കൃപേഷ് എന്നിവരെയാണ് പാലാരിവട്ടം പൊലീസ് അറസ്റ്റ് ചെയ്തത്. നോര്ത്ത് ജനതാ റോഡില് കെട്ടിടം വാടകയ്ക്കെടുത്തായിരുന്നു തട്ടിപ്പ്. തമിഴ്നാട് നാമക്കല് സ്വദേശികളായ സ്വര്ണപ്പണിക്കാരാണ് തട്ടിപ്പിന് ഇരയായത്. 50 ലക്ഷം രൂപയും 18 ലക്ഷം രൂപയുടെ രണ്ട് ചെക്കുകളും ഗുജറാത്ത് സംഘം ഇവരില് നിന്നും തട്ടിയെടുത്തു. സ്വര്ണാഭരണ ഫാക്ടറിയില്നിന്ന് ശേഖരിച്ച സ്വര്ണത്തരികള് അടങ്ങിയ മണ്ണാണെന്ന് വിശ്വസിപ്പിച്ചായിരുന്നു തട്ടിപ്പ്.അഞ്ഞൂറോളം ചാക്കുകളില് നിറച്ച മണ്ണില്നിന്ന് തമിഴ്നാട് സ്വദേശികളെക്കൊണ്ട് ഇവര് അഞ്ചുകിലോ സാമ്പിള് എടുപ്പിച്ചു. പിന്നീട് ഒരു മുറിയില് പ്രത്യേകം തയ്യാറാക്കിയ മേശയ്ക്കു മുകളില് വച്ച ത്രാസില് സാമ്പിള് തൂക്കി.മേശയ്ക്കടിയില് ഒളിച്ചിരുന്ന പ്രതികളിലൊരാള് ടേബിളിലും ത്രാസിലും നേരത്തേ സൃഷ്ടിച്ചിരുന്ന ദ്വാരത്തിലൂടെ സിറിഞ്ച് ഉപയോഗിച്ച് മണ്ണ് നിറച്ച കിറ്റിലേക്ക് സ്വര്ണലായനി കുത്തിവച്ചു.സാമ്പിളില്നിന്ന് സ്വര്ണം വേര്തിരിച്ചെടുക്കാന് കഴിഞ്ഞതോടെ നാമക്കല് സ്വദേശികള്ക്ക് വിശ്വാസമായി.അഞ്ചു ടണ് മണ്ണ് വാങ്ങിയ ഇവര്ക്ക് പിന്നീടാണ് തട്ടിപ്പ് മനസിലായത്. തുടര്ന്നാണ് ഇവര് പാലാരിവട്ടം പൊലീസില് പരാതി നല്കിയത്. സമാനരീതിയില് തട്ടിപ്പ് നടത്തിയതിന് പ്രതികള്ക്കെതിരെ തമിഴ്നാട് സേന്തമംഗലം സ്റ്റേഷനിലും എറണാകുളം നോര്ത്ത് സ്റ്റേഷനിലും പരാതികള് ലഭിച്ചിട്ടുണ്ട്.കോടതിയില് ഹാജരാക്കിയ പ്രതികളെ റിമാന്ഡ് ചെയ്തു
