മലപ്പുറം: ഭാര്യയെ ഓട്ടോറിക്ഷയില് കയറ്റിക്കൊണ്ട് പോകുന്നതിന്റെ ചിത്രമെടുത്തത് ചോദ്യം ചെയ്ത യുവാവിന് മര്ദ്ദനം. മലപ്പുറം ജില്ലയിലെ താനാളൂരിലാണ് ഓട്ടോ ഡ്രൈവറായ മുഹമ്മദ് യാസിറിന് സ്വകാര്യ ബസ് ജീവനക്കാരുടെ മര്ദ്ദനമേറ്റത്. അല് സഫര് എന്ന ബസിലെ ജീവനക്കാരാണ് യാസിറിനെ മര്ജ്ജിച്ചത്. ബസ് സ്റ്റോപ്പില് നില്ക്കുകയായിരുന്ന സ്വന്തം ഭാര്യയെയാണ് യാസിര് ഓട്ടോയില് കയറ്റി കൊണ്ട് പോയത്. ഇത് കണ്ട ബസ് ജീവനക്കാര് കരുതിയത് ബസ് കാത്ത് നില്ക്കുന്നവരെ ഓട്ടോയില് സവാരി കൊണ്ട് പോകുന്നു എന്നാണ്. ബസ് കാത്തിരിപ്പ് കേന്ദ്രത്തില് കയറി സവാരി എടുക്കുന്നുവെന്ന് തെറ്റിദ്ധരിച്ച ജീവനക്കാര് ഇതിന്റെ ചിത്രം പകര്ത്തുകയും ചെയ്തു. ചിത്രമെടുത്തത് കണ്ട മുഹമ്മദ് യാസിര് ബസ് ജീവനക്കാരെ ചോദ്യം ചെയ്യുകയായിരുന്നു. ബുധനാഴ്ച വൈകുന്നേരം നടന്ന സംഭവത്തിന്റെ സിസിടിവി ദൃശ്യങ്ങള് പ്രചരിച്ചിരുന്നു. യാസിറിനെ നെഞ്ചില് ചവിട്ടി വീഴ്ത്തിയ ശേഷമാണ് ബസ് ജീവനക്കാര് ചേര്ന്ന് മര്ദ്ദിച്ച് അവശനാക്കിയത്.
ഓട്ടോറിക്ഷ ഡ്രൈവറായ മുഹമ്മദ് യാസിര് ഭാര്യയെ കൂട്ടാനാണ് സ്റ്റാന്ഡിലെത്തിയത്. ഈ സമയത്ത് അല് സഫര് ബസ് സ്റ്റാന്റിലെത്തി. ബസ് കാത്തു നില്ക്കുന്ന യാത്രക്കാരെ ഓട്ടോയില് കയറ്റിയെന്ന് തെറ്റിദ്ധരിച്ച് കണ്ടക്ടര് യുവതിയുടേയും ഓട്ടോറിക്ഷ ഡ്രൈവറുടേയും ഫോട്ടോയെടുത്തു. പിന്നീട് ബസ് ഓടിച്ച് പോയി. എന്നാല് ഭാര്യയുടെ ചിത്രം ഡിലീറ്റ് ചെയ്യണമെന്ന യാസിറിന്റെ ആവശ്യം കേട്ട ബസ് ജീവനക്കാര് പ്രകോപിതരാകുകയും സംഘം ചേര്ന്ന് മര്ദ്ദിച്ച് അവശനാക്കുകയുമായിരുന്നു. പൊലീസില് പരാതി നല്കിയിട്ടുണ്ടെന്നും നിയമനടപടിയുമായി മുന്നോട്ട് പോകുമെന്നും മുഹമ്മദ് യാസിര് പ്രതികരിച്ചു.
