പഞ്ചാരക്കൊല്ലിയിലെ നരഭോജിക്കടുവയെ ചത്ത നിലയിൽ കണ്ടെത്തിയെന്ന് സൂചന. സിസിഎഫ് ഉടൻ മാധ്യമങ്ങളെ കാണും. കടുവയെ കണ്ടെത്താനുളള പ്രത്യേക ദൗത്യം ആരംഭിച്ചതിനു പിന്നാലെയാണ് കടുവയെ ചത്ത നിലയിൽ കണ്ടെത്തിയത്.
രാവിലെ ഏഴു മണിയോടെ പിലാക്കാവ് ഭാഗത്താണ് വെറ്ററിനറി സംഘം തിരച്ചിലിന് ഇറങ്ങിയത്. കടുവയുടെ കാൽപ്പാട്, കടുവ കിടന്ന സ്ഥലം എന്നിവ തേടിയായിരുന്നു തിരച്ചിൽ. കടുവയെ വെടിവച്ചു കൊല്ലണമെന്നായിരുന്നു സർക്കാർ നിർദേശം. സവിശേഷ ദൗത്യം ആയതിനാൽ 6 മണി മുതൽ മേഖലയിൽ 48 മണിക്കൂർ കർഫ്യു ആരംഭിച്ചിരുന്നു. മാനന്തവാടി നഗരസഭയിലെ പഞ്ചാരകൊല്ലി, ചിറക്കര, പിലാക്കാവ് ഡിവിഷനുകളിലെ മദ്രസകൾ, അങ്കണവാടികൾ, സ്കൂളുകൾ എന്നിവയ്ക്ക് അവധിയാണ്.
വനംവകുപ്പ് ദൗത്യ സംഘത്തിനൊപ്പം സ്പെഷൽ ഓപ്പറേഷൻ ഗ്രൂപ്പിലെ കമാൻഡോകളും കൂടി ദൗത്യത്തിൽ പങ്കാളികളാണ്. കടുവയെ കണ്ടാൽ വെടിവയ്ക്കാൻ കൂടി വേണ്ടിയാണ് ഷാർപ്പ് ഷൂട്ടർമാരെ കൂടി ഉൾപ്പെടുത്തിയത്. വനാതിർത്തി വളഞ്ഞാണു സംഘത്തിന്റെ ഓപ്പറേഷൻ. ഇതിനായി ആറു സംഘങ്ങളാണുള്ളത്.
പഞ്ചാരക്കൊല്ലി, മേലേ ചിറക്കര, പിലാക്കാവ് മൂന്ന് റോഡ് ഭാഗം, മണിയം കുന്നുഭാഗം എന്നിവിടങ്ങളിലാണ് നിരോധനാജ്ഞ. ഇവിടങ്ങളിൽ സഞ്ചാര വിലക്കുണ്ട്. ആളുകൾ പുറത്തിറങ്ങരുതെന്നും കടകൾ തുറക്കരുതെന്നുമാണ് നിർദേശം. പരീക്ഷകൾക്ക് പോകേണ്ട വിദ്യാർഥികൾക്കായി വാഹന സൗകര്യം ഏർപ്പെടുത്തി. പഞ്ചാരക്കൊല്ലിയിൽ വിവിധയിടങ്ങളിൽ പ്രഖ്യാപിച്ച നിരോധനാജ്ഞ നീട്ടിയിട്ടുണ്ട്
