ഇത്തവണയും ഞെട്ടിച്ച് മലയാളി; ക്രിസ്‌മസ് പുതുവത്സര ആഘോഷങ്ങൾക്ക് കുടിച്ച് തീർത്തത് കോടിക്കണക്കിന് രൂപയുടെ മദ്യം

സംസ്ഥാനത്ത് ക്രിസ്‌മസ് – പുതുവത്സര മദ്യവിൽപ്പനയിൽ വൻ വ‌ർദ്ധനയെന്ന് റിപ്പോർട്ട്. 712.96 കോടിയുടെ മദ്യമാണ് ഇന്നലെ വരെ വിറ്റഴിച്ചത്. കഴിഞ്ഞ വർഷം ഈ സീസണിൽ വിറ്റത് 697.05 കോടിയുടെ മദ്യമാണ്. ഇതിനെ മറികടന്നുകൊണ്ടുള്ള മദ്യവിൽപ്പനയാണ് ഇത്തവണ ഉണ്ടായത്. അതേസമയം, സംസ്ഥാനത്ത് ഏറ്റവും കൂടുതൽ മദ്യം വിറ്റത് പാലാരിവട്ടം ഔട്ട്‌ലറ്റിലാണ്. പവർ ഹൗസ് റോഡ് ഔട്ട്‌ലെറ്റിനാണ് രണ്ടാം സ്ഥാനം. ഇടപ്പള്ളി ഒട്ട്‌ലെറ്റാണ് മൂന്നാം സ്ഥാനത്ത്. കഴിഞ്ഞ മാസം 22 മുതൽ 31 വരെയുള്ള കണക്കുകളാണ് ബെവ്‌കോ പുറത്തുവിട്ടിരിക്കുന്നത്. ഇതുപ്രകാരം 712.96 കോടിയുടെ മദ്യമാണ് വിറ്റുപോയത്. ഇത് കഴിഞ്ഞ സീസണിനെക്കാൾ കൂടുതലാണ്. സാധാരണ കൊല്ലം ആശ്രമ മൈതാനത്തെ ഔട്ട്‌ലെറ്റിലാണ് എല്ലാവർഷവും കൂടുതൽ മദ്യവിൽപ്പന ഉണ്ടാവുന്നത്. എന്നാൽ, ഇത്തവണ നാലാം സ്ഥാനത്താണ് കൊല്ലം ഔട്ട്‌ലെറ്റ്. ചാലക്കുടിയിലുള്ള ഔട്ട്‌ലെറ്റിലും വലിയ രീതിയിൽ മദ്യവിൽപ്പന നടന്നിട്ടുണ്ടെന്നാണ് ബെവ്‌കോയുടെ കണക്ക്.