എം.ടി അനുസ്മരണം ;നിർമ്മാല്യം പിറന്ന മൂക്കുതലയിൽ സംഘാടക സമിതി രൂപീകരിച്ചു

ചങ്ങരംകുളം:ലോക ശ്രദ്ധയിൽ മൂക്കുതല ഗ്രാമത്തെ തൻ്റെ ആദ്യ സിനിമയിലൂടെ പരിചയപ്പെടുത്തിയ എം.ടിക്ക് സ്മരണാഞ്ജലി അർപ്പിക്കാൻ മൂക്കുതല ഗ്രാമം ഒരുങ്ങുന്നു.അരനൂറ്റാണ്ടുകൾക്ക് മുമ്പ് അതിശയോക്തിയോടെ കണ്ടിരുന്ന സിനിമയുടെ ഷൂട്ടിങ് സ്വന്തം ഗ്രാമത്തിലെത്തിയപ്പോൾ ആവേശത്തോടെ വരവേറ്റ അന്നത്തെ യുവതലമുറയും പുതിയ തലമുറക്കാരും ചേർന്നാണ് ജനുവരി 14 ചൊവ്വാഴ്ച്ച വൈകീട്ട് 5 മണിക്ക് വാര്യർ മൂല സിറ്റി സെൻ്റർ കോമ്പൗണ്ടിൽ പുരോഗമന കലാ – സാഹിത്യ സംഘത്തിൻ്റെ ആഭിമുഖ്യത്തിൽ എം.ടി. അനുസ്മരണം സംഘടിപ്പിക്കുന്നത്. എം ടിയുമായി ദീർഘകാലം കർമ്മമേഖലയിൽ യോജിച്ച് പ്രവർത്തിച്ചിരുന്ന സാഹിത്യകാരൻ ആലങ്കോട് ലീലാകൃഷ്ണൻ,പൊന്നാനി എം.എൽ.എയും തുഞ്ചൻ സ്മരക ട്രസ്റ്റിൻ്റെ ചെയർമാനുമായ .പി.നന്ദകുമാർ,സാംസ്കാരിക പ്രവർത്തകൻ വി.മോഹന കൃഷ്ണൻ തുടങ്ങിയവർ എം.ടിയെ അനുസ്മരിച്ച് സംസാരിക്കും. തുടർന്ന് എം.ടിയുടെ രചനയിൽ പിറന്ന സിനിമകകളും, നിർമ്മാല്യം പി.ഒ എന്ന പേരിൽ നിർമ്മിച്ച ഡോക്യുമെൻററിയും പ്രദർശിപ്പിക്കും. പരിപാടിയുടെ ഒരുക്കങ്ങൾക്കായി എം.അജയഘോഷ് ചെയർമാനും ശ്രീമതി പി.ബി ഷീല ടീച്ചർ കൺവീനറുമായ സംഘാടക സമിതി രൂപീകരിച്ചു.