മദ്യപിച്ചെത്തി ബഹളം വച്ചു; ശബരിമല ഡ്യൂട്ടിക്ക് എത്തിയ എസ്ഐയെ തിരിച്ചയച്ചു, വകുപ്പുതല നടപടിക്കും സാധ്യത

പത്തനംതിട്ട: ശബരിമല ഡ്യൂട്ടിക്ക് എത്തിയ എസ്ഐയെ തിരിച്ചയച്ചു. മദ്യപിച്ച് ബഹളം വെച്ച എം എസ് പി ക്യാമ്പിലെ എസ്ഐ പത്മകുമാറിനെയാണ് തിരിച്ചയച്ചത്. നിലക്കലിലാണ് ഇന്നലെ രാത്രി 12 മണിയോടെ സംഭവം നടന്നത്.മദ്യപിച്ച് എത്തിയ ആൾ ബഹളം ഉണ്ടാക്കുന്നുവെന്ന് ഹോട്ടലുകാരാണ് പോലീസ് ഉദ്യോഗസ്ഥരെ അറിയിച്ചത്. തുടർന്ന് പോലീസ് എത്തി കസ്റ്റഡിയിൽ എടുക്കുകയായിരുന്നു. അപ്പോഴാണ് ഇദ്ദേഹം പോലീസ് ഉദ്യോഗസ്ഥൻ ആണെന്ന് മനസ്സിലായത്. പിന്നാലെ നടത്തിയ വൈദ്യ പരിശോധനയിൽ മദ്യപിച്ചതായി തെളിഞ്ഞതിനെത്തുടർന്ന് രാത്രി തന്നെ അദ്ദേഹത്തെ മടക്കി അയക്കുകയായിരുന്നു. സംഭവത്തെക്കുറിച്ച് ഡിജിപിക്ക് റിപ്പോർട്ട് നൽകിയിട്ടുണ്ട്. ഇയാൾക്കെതിരെ വകുപ്പുതല നടപടിക്കും സാധ്യതയുണ്ട് എന്നാണ് അധികൃതർ അറിയിക്കുന്നത്.