വിദ്യാര്‍ത്ഥികള്‍ നടക്കുന്നത് റോഡിലൂടെ’കാത്തിരിക്കുന്നത് വലിയ ദുരന്തം’സംസ്ഥാന പാതയോരത്തെ പൊന്തക്കാടുകള്‍ വൃത്തിയാക്കണമെന്ന് നാട്ടുകാര്‍

ചങ്ങരംകുളം:സംസ്ഥാന പാതയോരത്തെ പൊന്തക്കാടുകള്‍ വൃത്തിയാക്കണമെന്ന ആവശ്യം ശക്തമാകുന്നു.കുറ്റിപ്പുറം തൃശ്ശൂര്‍ സംസ്ഥാന പാതയില്‍ ചങ്ങരംകുളം മുതല്‍ കോലിക്കര വരെയുള്ള റോഡിലാണ് വിദ്യാര്‍ത്ഥികള്‍ അടക്കമുള്ള കാല്‍നട യാത്രക്കാര്‍ റോഡിലൂടെ നടക്കുന്നത്.പായോരം മുഴുവന്‍ പുല്ലും കാടും വന്ന് നിറഞ്ഞ് റോഡിലേക്ക് ഇറങ്ങിയതോടെയാണ്കാല്‍നടയാത്ര അപകടഭീഷണിയിലായത്.തിരക്കേറിയ പാതയോരത്താണ് ആയിരക്കണക്കിന് വിദ്യാര്‍ത്ഥികള്‍ പഠനം നടത്തുന്ന അസ്സബാഹ് കോളേജ്,എംവിഎം സ്കൂള്‍ അടക്കം സ്ഥിതി ചെയ്യുന്നത്.ചങ്ങരംകുളം ടൗണ്‍ മുതല്‍ വളയംകുളം വരെയുള്ള പാതയോരത്ത് ടൗണ്‍ നവീകരണ പ്രവൃത്തിയുടെ ഭാഗമായി ഒഴിവാക്കിയ മണ്ണും കോണ്‍ഗ്രീറ്റ് വേസ്റ്റുകളും തള്ളിയിട്ട് മാസങ്ങളായി.മഴ പെയ്തതോടെ ഇവ മുഴുവന്‍ ചെളിയായി റോഡില്‍ ഇറങ്ങി കിടക്കുന്നതും അപകടങ്ങള്‍ക്ക് കാരണമാകുന്നുണ്ട്.പാതയോരത്ത് നിന്ന് മുറിച്ച മരങ്ങളും,ജലജീവന്‍ പദ്ധതിക്കായി ഇറക്കിയ പൈപ്പുകളും,കെഎസ്ഇബി ഇറക്കിയിട്ട വൈദ്യതി കാലുകളും,പാതയോരം മുഴുവന്‍ കാട് പിടിച്ച് കിടക്കുകയാണ്.അനധികൃതമായി നിര്‍മിച്ച ഷെഡുകളും പാതയോരത്ത് കാട് പിടിച്ച് യാത്രക്കാര്‍ക്ക് നടക്കാനോ വാഹനം നിര്‍ത്താനോ കഴിയാത്ത അവസ്ഥയില്‍ കിടക്കാന്‍ തുടങ്ങിയിട്ട് വര്‍ഷങ്ങളായെങ്കിലും പൊതുമരാമത്ത് ഇവിടേക്ക് തിരിഞ്ഞ് നോക്കുന്നില്ലെന്നും നാട്ടുകാര്‍ പറയുന്നു.പാതയോരത്തെ ഡ്രൈനേജുകള്‍ മുഴുവന്‍ കല്ലും മണ്ണും മാലിന്യവും മൂടി അടഞ്ഞ അവസ്ഥയിലാണ്.മഴ പെയ്താല്‍ വെള്ളം മുഴുവന്‍ തിരക്കേറിയ പാതയില്‍ കെട്ടി കിടക്കുന്നതും വലിയ അപകടങ്ള്‍ക്ക് ഇടയാക്കുമെന്നും ആക്ഷേപമുയരുന്നുണ്ട്.പാതയോരം വൃത്തിയാക്കി എത്രയും വേഗം യാത്രക്കാര്‍ക്ക് സുരക്ഷ ഒരുക്കിയില്ലെങ്കില്‍ വലിയ ദുരന്തങ്ങള്‍ക്ക് ഇടയാക്കുമെന്നും നാട്ടുകാര്‍ ഓര്‍മപ്പെടുത്തുന്നുണ്ട്