കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സാ പിഴവിനെ തുടര്‍ന്ന് രോഗി മരിച്ചെന്ന പരാതിയുമായി കുടുംബം. കോഴിക്കോട് വാണിമേല്‍ സ്വദേശി പറമ്പത്ത് റീജിത്ത് ആണ് ഇന്ന് പുലര്‍ച്ചെ മരിച്ചത്. വൃക്കയിലെ കല്ല് നീക്കാന്‍ നടത്തിയ ശസ്ത്രക്രിയ പാളിയെന്നാണ് കുടുംബത്തിന്റെ ആരോപണം. പരിശോധനയ്ക്കായി യൂറോളജി വിഭാഗം മേധാവി കൈക്കൂലി വാങ്ങിയെന്നും കുടുംബം ആരോപിക്കുന്നു. മെഡിക്കല്‍ കോളേജ് അധികൃതര്‍. യൂറോളജി വിഭാഗത്തോട് റിപ്പോര്‍ട്ട് തേടി.
2025 ആഗസ്റ്റിലാണ് കോഴിക്കോട് വാണിമേല്‍ സ്വദേശി പറമ്പത്ത് റീജിത്തിനെ കോഴിക്കോട് മെഡിക്കല്‍ കോളജ് ആശുപത്രിയിലെ യൂറോളജി വിഭാഗത്തില്‍ പ്രവേശിപ്പിച്ചത്. ആഗസ്റ്റ് ആറിന് റീജിത്തിനെ കീഹോള്‍ ശസ്ത്രക്രിയയ്ക്ക് വിധേയനാക്കി. വൃക്കയില്‍ ഇടതുഭാഗത്തെ കല്ല് നീക്കം ചെയ്യുന്നതിനായിരുന്നു ശസ്ത്രക്രിയ. എന്നാല്‍ ഡോക്ടര്‍മാര്‍ വലതുഭാഗത്താണ് ശസ്ത്രക്രിയ നടത്തിയത് നടത്തിയതെന്നും, ശസ്ത്രക്രിയ കഴിഞ്ഞത് മുതല്‍ ആരോഗ്യനില അനുദിനം വഷളായെന്നും കുടുംബം ആരോപിച്ചു.
ഏപ്രില്‍ 1ന് ആണ് കോഴിക്കോട് മെഡിക്കല്‍ കോളേജ് ആശുപത്രിയില്‍ റീജിത്തിന്റെ രണ്ടാമത്തെ ശസ്ത്രക്രിയ നടത്തിയത്. കുടുംബാംഗങ്ങളുടെ സമ്മതമില്ലാതെയാണ് ഇടതുഭാഗത്ത് ശസ്ത്രക്രിയ നടത്തിയതെന്നും ബന്ധു ആരോപിക്കുന്നു.
ആരോഗ്യനില വഷളായതിനെ തുടര്‍ന്ന് മെയ് 18ന് ആണ് റീജിത്തിനെ മെഡിക്കല്‍ കോളേജില്‍ വീണ്ടും പ്രവേശിപ്പിക്കുന്നത്. ശ്വാസകോശത്തിനും വൃക്കകള്‍ക്കും അണുബാധയുണ്ടായതിനെ തുടര്‍ന്ന് മെയ് 30ന് ഇദ്ദേഹത്തെ ഐസിയുവിലേക്ക് മാറ്റി. അതീവ ഗുരുതരാവസ്ഥയില്‍ വെന്റിലേറ്ററില്‍ കഴിയുകയായിരുന്നു റീജിത്ത് ഇന്ന് പുലര്‍ച്ചെയാണ് മരിച്ചത്. ശസ്ത്രക്രിയയ്ക്ക് ശേഷം യൂറോളജി വിഭാഗം മേധാവി ഡോക്ടര്‍ വേണുഗോപാലിന് 5000 രൂപ നല്‍കിയെന്നും ബന്ധു പറഞ്ഞു.
ചികിത്സ പിഴവില്‍ മെഡിക്കല്‍ കോളേജ് സൂപ്രണ്ടിനും, പൊലീസിനും പരാതി നല്‍കിയെങ്കിലും വേണ്ട നടപടികള്‍ കൈക്കൊണ്ടില്ലെന്നും ബന്ധുക്കള്‍ ആരോപിക്കുന്നു. യൂറോളജി വിഭാഗം മേധാവിയോട് റിപ്പോര്‍ട്ട് തേടിയിട്ടുണ്ട് എന്നാണ് ആശുപത്രി അധികൃതരുടെ വിശദീകരണം. മെഡിക്കല്‍ കോളജ് പൊലീസും പ്രാഥമിക അന്വേഷണം ആരംഭിച്ചിട്ടുണ്ട്.
