മഴക്കാലപൂർവ്വ ശുചീകരണ യജ്ഞവുമായി റേഞ്ചേഴ്സ് യൂണിറ്റ്

ചങ്ങരംകുളം:മഴക്കാല രോഗങ്ങൾ തടയുന്നതിന്റെ ഭാഗമായി പാവിട്ടപ്പുറം അസ്സബാഹ് ഹയർ സെക്കണ്ടറി സ്‌കൂൾ ഫോർ ഗേൾസ് സ്കൂളിലെ റേഞ്ചർ യൂണിറ്റിന്റെ നേതൃത്വത്തിൽ “മഴക്കാല പൂർവ ശുചീകരണ യജ്ഞം” സംഘടിപ്പിച്ചു. സ്കൂൾ കോമ്പൗണ്ടും പരിസര പ്രദേശങ്ങളും റേഞ്ചർ വിദ്യാർത്ഥിനികൾ ശുചീകരിച്ചു.സ്കൂൾ വളപ്പിലെ പ്ലാസ്റ്റിക് മാലിന്യങ്ങൾ, ഉണങ്ങിയ ഇലകൾ, ചപ്പുചവറുകൾ എന്നിവ നീക്കം ചെയ്തു. ക്ലാസ് മുറികളുടെ പരിസരം, ടോയ്‌ലറ്റുകൾ,കുടിവെള്ള ടാങ്കിന്റെ പരിസരം എന്നിവിടങ്ങളും വൃത്തിയാക്കി.മഴവെള്ളം കെട്ടിനിൽക്കാൻ സാധ്യതയുള്ള ചിരട്ടകൾ, പൊട്ടിയ പാത്രങ്ങൾ,ഉപയോഗശൂന്യമായ ടയറുകൾ എന്നിവ കണ്ടെത്തി നശിപ്പിച്ചു. ശേഖരിച്ച മാലിന്യങ്ങൾ തരംതിരിച്ച് പ്ലാസ്റ്റിക് മാലിന്യം ഹരിത കർമ്മ സേനയ്ക്ക് കൈമാറി.റേഞ്ചർ ലീഡർ സുവിത കെ,അധ്യാപകരായ സജ്ന എസ് , അഹമ്മദ് പറയങ്ങാട്ടിൽ എന്നിവർ ശുചീകരണ പ്രവർത്തനങ്ങൾക്ക് നേതൃത്വം നൽകി.