ചങ്ങരംകുളം:അബായ ഷോപ്പില് ജീവനക്കാരിയായ യുവതിക്ക് നേരെ മുന് ഭര്ത്താവിന്റെ അക്രമം.തടയാന് ശ്രമിച്ച കടയുടമക്കും ക്രൂരമര്ദ്ധനം.സംഭവത്തില് യുവതിയുടെ മുന് ഭര്ത്താവ് പാവിട്ടപ്പുറം സ്വദേശി അഷറഫിനെ ചങ്ങരംകുളം പോലീസ് കസ്റ്റഡിയില് എടുത്തു.
വെള്ളിയാഴ്ച ഉച്ചക്ക് ഒരുമണിയോടെ ചങ്ങരംകുളം എടപ്പാള് റോഡില് പ്രവര്ത്തിക്കുന്ന സുറുമി അബായ സെന്ററിലാണ് സംഭവം.ഇവിടെ ജോലി ചെയ്തിരുന്ന നരണിപ്പുഴ സ്വദേശിയായ യുവതിയെ യാണ് ഭര്ത്താവ് ആയിരുന്ന അഷറഫ് കടയില് കയറി ഭീഷണിപ്പെടുത്തുകയും അക്രമിക്കുകയും ചെയ്തത്.സംഭവം കണ്ട് വന്ന കടയുടമ പൊന്നാനി സ്വദേശി നജീബ്(37)നെയും ഇയാള് അക്രമിക്കുകയായിരുന്നു.അക്രമത്തില് അവശനായ നജീബ് പുറത്തേക്ക് ഓടി സമീപത്തെ ബാങ്ക് ജീവനക്കാര്ക്കിടയില് അഭയം തേടുകയായിരുന്നു.തുടര്ന്ന് ബാങ്ക് ജീവനക്കാര് ചങ്ങരംകുളം പോലീസിനെ വിവരം അറിയിക്കുകയും ചെയ്തു.ചങ്ങരംകുളം പോലീസെത്തി യുവതിയുടെ മുന്ഭര്ത്താവ് കൂടിയായ അഷറഫിനെ സംഭവ സ്ഥലത്ത് നിന്ന് തന്നെ കസ്റ്റഡിയില് എടുത്തു.
പരിക്കേറ്റ കടയുടമ നജീബിനെയും ജീവനക്കാരിയെയും ഷോപ്പിലെ മറ്റു ജീവനക്കാരും സമീപത്തെ കടക്കാരും ചേര്ന്ന് ചങ്ങരംകുളം സണ്റൈസ് ആശുപത്രിയില് പ്രവേശിപ്പിച്ചു.യുവതിയും അശറഫുമായി നേരത്തെ തര്ക്കങ്ങള് നിലനിന്നിരുന്നു.അഷറഫിന്റെ ശല്ല്യം സഹിക്കാതെ വന്നതോടെ യുവതി കോടതി വഴി വിവാഹ മോചനം തേടുകയായിരുന്നു.വിവാഹ മോചനത്തിന് ശേഷവും യുവതി ജോലി ചെയ്തിരുന്ന സ്ഥാപനങ്ങളില് എത്തി അഷറഫ് ഭീഷണിപ്പെടുത്തുന്നത് പതിവാണെന്നും ഒരാഴ്ച മുമ്പ് കടയില് എത്തി യുവതിയെ ജോലിക്ക് വെക്കരുതെന്ന് കടയുടമയെ ഭീഷണിപ്പെടുത്തിയിരുന്നതായും മര്ദ്ധനമേറ്റ നജീബ് പറഞ്ഞു.സംഭവത്തില് യുവതി നല്കിയ പരാതിയില് പോലീസ് അഷറഫിനെ വിളിച്ച് വരുത്തി താക്കീത് നല്കി വിട്ടയച്ചിരുന്നു.അക്രമത്തിന്റെ സിസിടിവി ദൃശ്യങ്ങളും പുറത്ത് വന്നിട്ടുണ്ട്.സംഭവത്തില് കേസെടുത്തെന്നും അന്വേഷണം തുടരുകയാണെന്നും ചങ്ങരംകുളം പോലീസ് അറിയിച്ചു.
