അൻവറിനെ ഒപ്പം നിർത്താൻ യുഡിഎഫ്, സ്ഥാനാർത്ഥിയെ പിൻവലിച്ച് പിന്തുണ നൽകണമെന്ന് ആവശ്യപ്പെട്ടു; സ്ഥിരീകരിച്ച് അൻവർ

നിലമ്പൂർ: മുന്നോട്ടുവെച്ച ഉപാധികൾ അംഗീകരിക്കാതെ പാലക്കാട്ട് ഉപതിരഞ്ഞെടുപ്പിൽ ഡി.എം.കെ പിന്തുണ നൽകുന്ന സ്ഥാനാർഥിയെ പിൻവലിക്കില്ലെന്ന് പി.വി അൻവർ എം.എൽ.എ. യു.ഡി.എഫിലെ ഉത്തരവാദിത്തപ്പെട്ട നേതാക്കൾ ബന്ധപ്പെടുന്നുണ്ട്. മണ്ഡലത്തിൽ ബി.ജെ.പി ജയിക്കാനുള്ള സാധ്യത തടയാൻ സ്ഥാനാർഥിയെ പിൻവലിച്ച് യു.ഡി.എഫിന് പിന്തുണ നൽകാം. പകരം ചേലക്കരയിൽ ഡി.എം.കെ പിന്തുണയ്ക്കുന്ന സ്വതന്ത്ര സ്ഥാനാർഥിയെ യു.ഡി.എഫ് പിന്തുണയ്ക്കണമെന്നും അൻവർ പറഞ്ഞു.കഴിഞ്ഞ രണ്ടുമൂന്നു ദിവസമായി യു.ഡി.എഫ് നേതൃത്വം പലരീതിയിലും ബന്ധപ്പെടുന്നുണ്ട്. കേരളത്തിൽ ബി.ജെ.പി ജയിച്ചുകയറാൻ സാധ്യതയുള്ള ഒരു സീറ്റെന്ന നിലയിൽ പാലക്കാട്ട് ഡി.എം.കെ യു.ഡി.എഫ് സ്ഥാനാർഥിയെ പിന്തുണയ്ക്കാം. ബി.ജെ.പിയുടെ സാധ്യത തടയാൻ വിഷമത്തോടുകൂടെയാണെങ്കിലും പിന്തുണക്കാമെന്ന് പറഞ്ഞിരുന്നു. എന്നാൽ അതിന് പകരം ചേലക്കരയിൽ മത്സരിക്കുന്ന യു.ഡി.എഫ് സ്ഥാനാർഥിയെ പിൻവലിച്ച് അവിടെ ഡി.എം.കെ പിന്തുണയ്ക്കുന്ന സ്വതന്ത്ര സ്ഥാനാർഥി സുധീറിനെ പിന്തുണയ്ക്കണമെന്നാണ് പറഞ്ഞിരുന്നതെന്ന് അൻവർ വ്യക്തമാക്കി.ഉപതിരഞ്ഞെടുപ്പുമായി ബന്ധപ്പെട്ട് നോമിനേഷൻ കൊടുക്കുകയോ ബാക്കി കാര്യങ്ങളോ ഒന്നും ആയിട്ടില്ല. സത്യസന്ധമായിട്ടാണ് യു.ഡി.എഫ് ഈ നിലപാട് എടുക്കുന്നതെങ്കിൽ അവർക്ക് പിന്തുണയ്ക്കാം. എന്നാൽ അതിന്റെ പ്രായോഗിക ബുദ്ധിമുട്ടുകൾ നേതൃത്വം അറിയിക്കുകയായിരുന്നുവെന്നും അൻവർ കൂട്ടിച്ചേർത്തു.