സമൂഹ സേവനത്തിൽ മാതൃകയായി നെഹില ജെസീറിന്,ബി.എസ്.എസ് ദേശീയ പുരസ്കാരം നൽകി ആദരിച്ചു

ചങ്ങരംകുളം:സാമൂഹിക സേവന രംഗത്ത് ശ്രദ്ധേയമായ പ്രവർത്തനങ്ങൾ കാഴ്ചവെച്ച നെഹില ജെസീറിനെ ബി.എസ്.എസ് ദേശീയ പുരസ്കാരത്തിന് അർഹയാക്കി. തിരുവനന്തപുരം ആസ്ഥാന മന്ദിരത്തിൽ നടന്ന പുരസ്കാര വിതരണച്ചടങ്ങിൽ ബി.എസ്.എസ് ദേശീയ ചെയർമാൻ ഡോ. ബി. എസ്. ബാലചന്ദ്രൻ അവർക്കു പുരസ്കാരം നൽകി ആദരിച്ചു.
മലപ്പുറം ജില്ലയിലെ ആലംകോട് പഞ്ചായത്തിലെ പാവിട്ടപ്പുറം ദേശത്ത് താമസിക്കുന്ന കോട്ടിൽ വളപ്പിൽ ജെസീറിന്റെ ഭാര്യയായ നെഹില ജെസീർ, സൈക്കോളജി കൗൺസിലിംഗ് രംഗത്ത് സമർപ്പിതമായ സേവനം അനുഷ്ഠിച്ചുവരുന്ന വ്യക്തിയാണ്. മാനസികാരോഗ്യത്തിന്റെ പ്രാധാന്യം സമൂഹത്തിൽ ഉയർത്തിപ്പിടിക്കുന്നതിൽ അവളുടെ ഇടപെടലുകൾ ശ്രദ്ധേയമാണ്.
ഓൺലൈൻ, ഓഫ്‌ലൈൻ വഴികളിലൂടെ പൂർണ്ണമായും സൗജന്യമായി കൗൺസിലിംഗ് സേവനം നൽകിക്കൊണ്ട് സാമ്പത്തികവും മാനസികവുമായ ബുദ്ധിമുട്ടുകൾ അനുഭവിക്കുന്ന നിരവധി ആളുകൾക്ക് അവർ പിന്തുണയായി മാറിയിട്ടുണ്ട്. വിവിധ പ്രായക്കാർക്കും ജീവിത സാഹചര്യങ്ങൾക്കുമനുസരിച്ച് നൽകിയ മാനസിക പിന്തുണയും മാർഗനിർദ്ദേശങ്ങളും പല കുടുംബങ്ങൾക്കും പുതുജീവിതം നൽകിയതായി അറിയുന്നു.
കഴിഞ്ഞ മൂന്ന് വർഷമായി സ്വന്തം മകന്റെ ഗുരുതരമായ ചികിത്സയുമായി ബന്ധപ്പെട്ട് ഏറെ പ്രയാസകരമായ സാഹചര്യങ്ങൾ നേരിട്ടിട്ടും, തന്റെ സേവനങ്ങളിൽ യാതൊരു വിട്ടുവീഴ്ചയും വരുത്താതെ അതീവ പ്രതിബദ്ധതയോടെയും പ്രൊഫഷണലിസത്തോടെയും പ്രവർത്തിച്ചുവരികയാണ് അവർ.കോഴിക്കോട് ഹൈഫ് അക്കാദമിയിൽ ഫാക്കൽറ്റിയുമായും പി.ആർ.ഒയായും സേവനം അനുഷ്ഠിക്കുന്ന നെഹില ജെസീർ,തന്റെ അറിവും അനുഭവവും പങ്കുവെച്ച് പുതിയ തലമുറയെ വളർത്തുന്നതിലും ശ്രദ്ധ കേന്ദ്രീകരിക്കുന്നു. കൂടാതെ മെന്റലിസ്റ്റ്, ചിത്രകാരി എന്നീ നിലകളിലും അവൾ സൃഷ്ടിപരമായ കഴിവുകൾ സമൂഹത്തിന്റെ മാനസിക വളർച്ചയ്ക്കായി വിനിയോഗിക്കുന്നു.
മനസ്സ് തളർന്നവർക്കും വഴിതെറ്റിയവർക്കും ആത്മവിശ്വാസവും പ്രതീക്ഷയും പകരുന്ന പ്രവർത്തനങ്ങളിലൂടെ സമൂഹത്തിൽ മാറ്റം സൃഷ്ടിക്കുന്ന നെഹില ജെസീർ, സാമൂഹിക സേവന രംഗത്ത് ശ്രദ്ധേയമായ സംഭാവനകൾ നൽകിയ വ്യക്തിയായി വിലയിരുത്തപ്പെടുന്നു.