​അഴകേറും ഗ്രാമം:ഹരിതകേരള മിഷന്റെ ആർത്തവശുചിത്വ ആരോഗ്യ പദ്ധതിക്ക് മാറഞ്ചേരിയില്‍ തുടക്കം

​മാറഞ്ചേരി: മാറഞ്ചേരി ഗ്രാമപഞ്ചായത്തിന്റെ ശുചിത്വ പദ്ധതിയായ ‘അഴകേറും ഗ്രാമം’ പദ്ധതിയുടെ ഭാഗമായി വ്യക്തിശുചിത്വം,പരിസര ശുചിത്വം, സ്ഥാപന ശുചിത്വം എന്നിവ ശക്തിപ്പെടുത്തുന്നതിനായി ഹരിതകേരള മിഷന്റെ ആർത്തവശുചിത്വ ആരോഗ്യ പദ്ധതിക്ക് തുടക്കമായി.പദ്ധതിയുടെ ഭാഗമായി ലഭിച്ച നാപ്കിൻ ഡിസ്ട്രോയർ ഇൻസിനറേറ്റർ മാറഞ്ചേരി ഗവൺമെന്റ് ഹയർ സെക്കൻഡറി സ്കൂളിൽ സ്ഥാപിച്ച് പ്രവർത്തനം ആരംഭിച്ചു.പ്രവർത്തനോദ്ഘാടന ചടങ്ങിൽ ഹൈസ്കൂൾ ഹയർ സെക്കൻഡറി സ്കൂൾ വിദ്യാർഥികൾക്കായി മെൻസ്ട്രുവൽ കപ്പ് വിതരണവും ബോധവത്കരണ പരിശീലന ക്ലാസും സംഘടിപ്പിച്ചു.പരിസര മലിനീകരണത്തിന് കാരണമാകുന്ന നാപ്കിനുകളുടെയും പാഡ്കളുടെയും ഉപയോഗം കുറച്ച് കൊണ്ട് വന്നു കൂടുതൽ സുരക്ഷിതവും ശുചിത്വ മാർഗവുമായ കപ്പുകൾ ഉപയോഗിക്കാൻ പുതുതലമുറയെ തയ്യാറാക്കുന്നതാണ് പുതിയ പദ്ധതി വിഭാവനം ചെയ്യുന്നത്.സ്കൂളുകളിൽ ഉപയോഗിച്ച നാപ്കിനുകളുടെ ശാസ്ത്രീയ നിർമാർജനത്തിനും പരിസര മലിനീകരണം ഒഴിവാക്കുന്നതിനുമായാണ് ഇൻസിനറേറ്റർ സ്ഥാപിച്ചത്.പെൺകുട്ടികളുടെ ശുചിമുറിയോട് ചേർന്ന് സ്ഥാപിച്ച ഈ ഉപകരണത്തിൽ നിക്ഷേപിക്കുന്ന നാപ്കിനുകൾ ഉയർന്ന താപനിലയിൽ ദഹിപ്പിച്ച് സുരക്ഷിതമായി ചാരമാക്കി മാറ്റും. ഇതിലൂടെ ദുർഗന്ധവും രോഗാണുവ്യാപനവും ഇല്ലാതാക്കാനും പരിസ്ഥിതി സൗഹൃദമായ മാലിന്യനിർമാർജനം സാധ്യമാക്കാനും കഴിയും.ഗ്രാമപഞ്ചായത്ത് വൈസ് പ്രസിഡന്റ് ഖദീജ മൂത്തേടത്ത് ഉദ്ഘാടനം ചെയ്തു.സ്കൂൾ പ്രിൻസിപ്പൽ ലൗലി അധ്യക്ഷത വഹിച്ചു.ഹെഡ്മിസ്ട്രസ് സരസ്വതി, പി.ടി.എ എക്സിക്യൂട്ടീവ് അംഗം ജസീല പി.സി., നിഷ ശിനീഷ്, സിനില എന്നിവർ സംസാരിച്ചു.ഹരിതകേരള മിഷൻ കോർഡിനേറ്റർ കുൽസുപനമ്പാടൻ ആർത്തവശുചിത്വം, ആരോഗ്യപരിപാലനം, മെൻസ്ട്രുവൽ കപ്പുകളുടെ ഉപയോഗം എന്നിവയെക്കുറിച്ച് ക്ലാസ് നയിച്ചു.ശുചിത്വബോധം വർദ്ധിപ്പിക്കുന്നതിനും ആരോഗ്യകരമായ ശീലങ്ങൾ വളർത്തുന്നതിനും പരിപാടി വിദ്യാർത്ഥിനികൾക്ക് ഏറെ സഹായകരമായി.