ചാലിശേരി സെൻ്റ് പീറ്റേഴ്സ് ആൻ്റ് സെൻ്റ് പോൾസ് യാക്കോബായ സുറിയാനി പള്ളിയിൽ തിരുവോണ നാളിൽ ഓണസദ്യ ഒരുക്കി

ചാലിശേരി സെൻ്റ് പീറ്റേഴ്സ് ആൻ്റ് സെൻ്റ് പോൾസ് യാക്കോബായ സുറിയാനി പള്ളിയിൽ വിശുദ്ധ ദൈവമാതാവിൻ്റ് എട്ടുനോമ്പ് പെരുന്നാളിൻ്റെ ഭാഗമായി തിരുവോണ നാളിൽ ഓണസദ്യ ഒരുക്കി.വെള്ളിയാഴ്ച രാവിലെ വിശുദ്ധ മൂന്നിൻമേൽ കുർബ്ബാനക്ക് ഫാ. രാജു മർക്കോസ് മുഖ്യകാർമ്മികനായി വൈദീകരായ ഫാദർ ഗീവർഗ്ഗീസ് ചെമ്മണ്ണൂർ,ഫാ. അനി ജോൺ വെന്നിലത്ത് , വികാരി ഫാദർ ബിജു മുങ്ങാം കുന്നേൽ സഹകാർമ്മികരായി.പകൽ ധ്യാനം ഇടവക മുൻ വികാരി ഫാ. യെൽദോ എം ജോയ് നയിച്ചു എല്ലാവർക്കും ഓണാശംസകളും നേർന്നു എം.പി. പി.എം യൂത്ത് അസോസിയേഷൻ്റെ നേതൃത്വത്തിൽ പായസ വിതരണവും ഉണ്ടായി.ഉച്ചക്ക് വിഭവ സമൃദ്ധമായ ഓണസദ്യ ഒരുക്കി വൈദീകർക്കൊപ്പം നൂറുകണക്കിന് വിശ്വാസികൾ ഓണ സദ്യയിൽ പങ്കാളികളായി.പച്ച വാഴയിലയിൽപഴം , പപ്പടം , തോരൻ , എലുശ്ശേരി , അച്ചാർ , ഇൻജുപുളി തുടങ്ങി പത്തോളം വിഭവങ്ങൾ അടങ്ങിയ ഓണസദ്യ അവസാനത്തിൽ പായസത്തിൻ്റെ മധുരവും നൽകി.അഞ്ചാം ദിവസംരാത്രി യോഗത്തിൽ നന്ദു ജോൺ ചാലക്കുടി വചനസന്ദേശം നൽകി.എട്ടുനോമ്പ് സുവിശേഷ യോഗം ശനിയാഴ്ച അവസാനിക്കും.ഏഴാംതിയ്യതി ഞായറാഴ്ച രാത്രി മലങ്കരയിലെ പ്രസിദ്ധവും ഭക്തിനിർഭരവുമായ എട്ടുനോമ്പ് റാസയും,വിശുദ്ധ സൂനോറോ വണക്കവും നടക്കും.എട്ടിന് വിശുദ്ധ കുർബ്ബാനക്ക് കുര്യാക്കോസ് മോർ യൗസേബിയോസ് മുഖ്യ കാർമ്മികത്വം വഹിക്കും ,പ്രദക്ഷിണം ,ആശീർവാദം , നേർച്ച സദ്യയോടെ പെരുന്നാൾ സമാപിക്കും.എട്ടുനോമ്പ് പെരുന്നാളിന് വികാരി ഫാ.ബിജുമുങ്ങാംകുന്നേൽ ട്രസ്റ്റി സി.യു ശലമോൻ , സെക്രട്ടറി ടൈറ്റസ് ഡേവീഡ് എന്നിവരടങ്ങുന്ന മാനേജിംഗ് കമ്മിറ്റി ,ഭക്തസംഘടനകൾ ,കുടുംബയൂണിറ്റ് ഭാരവാഹികൾ എന്നിവർ നേതൃത്വം നൽകും.