എംജിയില്‍ ഓണ്‍ലൈൻ യുജി, പിജി പ്രോഗ്രാമുകളില്‍ പ്രവേശനത്തിന് അപേക്ഷിക്കാം

തിരുവനന്തപുരം : മഹാത്മാഗാന്ധി സർവകലാശാലയുടെ ഓണ്‍ലൈൻ ബിരുദ, ബിരുദാനന്തര പ്രോഗ്രാമുകളില്‍ പ്രവേശനത്തിന് സെപ്റ്റംബർ 10 വരെ അപേക്ഷിക്കാം.
എംബിഎ (ഹ്യൂമൻ റിസോഴ്സസ് മാനേജ്മെന്റ്, മാർക്കറ്റിങ്, ഫിനാൻസ്), എംകോം(ഫിനാൻസ് ആൻഡ് ടാക്സേഷൻ), എംഎ ഇംഗ്ലീഷ്, എംഎ ഇക്കണോമിക്സ്, ബികോം (ഓണേഴ്സ്) ബിബിഎ (ഓണേഴ്സ്), ബിഎ പൊളിറ്റിക്കല്‍ സയൻസ് (ഓണേഴ്സ്) എന്നീ പ്രോഗ്രാമുകളിലേക്കാണ് പ്രവേശനം.സർവകലാശാലയുടെ സെന്റർ ഫോർ ഡിസ്റ്റൻസ് ആൻഡ് ഓണ്‍ലൈൻ എജുക്കേഷനാണ് പ്രോഗ്രാം നടത്തുന്നത്. യുജിസിയുടെ അംഗീകാരമുള്ള പ്രോഗ്രാമുകള്‍ റെഗുലർ ഡിഗ്രിക്ക് തുല്യമാണ്. ലോകത്തെവിടെനിന്നും ചേർന്നുപഠിക്കാം. വിവിധ കാരണങ്ങളാല്‍ കോളേജില്‍ പഠിക്കാൻ കഴിയാതിരുന്നവർക്കും ജോലിയോടൊപ്പം പഠനം തുടരാൻ ആഗ്രഹിക്കുന്നവർക്കും പ്രവേശനം നേടാം.
റെഗുലർ പ്രോഗ്രാമുകള്‍ക്കൊപ്പം ഓണ്‍ലൈൻ പ്രോഗ്രാമുകള്‍ ചെയ്യാനാകും. ഓണേഴ്സ് ബിരുദ പഠനം നാലുവർഷമാണെങ്കിലും ആവശ്യമായ ക്രെഡിറ്റ് നേടി മൂന്നുവർഷം പൂർത്തീകരിക്കുന്നവർക്കും ബിരുദംനേടാവുന്ന രീതിയിലാണ് പാഠ്യപദ്ധതി. ലൈവ് ഇന്ററാക്ടീവ് സെഷനുകള്‍ക്കുപുറമേ റെക്കോഡ് ചെയ്ത വീഡിയോ ക്ലാസുകളും ഇ-ലേണിങ് മെറ്റീരിയലുകളും ഉപയോഗിക്കുന്നു. വീട്ടിലിരുന്ന് എഴുതാവുന്ന റിമോട്ട്ലി പ്രോക്ടേഡ് പരീക്ഷയാണ് നടത്തുക. വിശദവിവരങ്ങള്‍ക്കും അപേക്ഷിക്കുന്നതിനും cdoe.mgu.ac.in സന്ദർശിക്കുക. വിവരങ്ങള്‍ക്ക് 9188918258, 8547852326