ബസ് സമരം ഒഴിവാക്കുന്നതിനായി ബസുടമകളുമായി ചർച്ച നടത്തും; കൺസഷൻ ടിക്കറ്റ് നൽകാൻ ആപ്പ് പുറത്തിറക്കും: ഗണേഷ് കുമാർ

സംസ്ഥാനത്ത് പ്രഖ്യാപിച്ചിട്ടുള്ള സ്വകാര്യ ബസ് സമരം ഒഴിവാക്കുന്നതിനായി ബസുടമകളുമായി ചർച്ച നടത്തുമെന്ന് ഗതാഗത മന്ത്രി കെ.ബി. ഗണേഷ് കുമാർ. ആദ്യം ഗതാഗത കമ്മിഷണർ ബസുടമകളുമായി ചർച്ച നടത്തും. ഈ ചർച്ച വിജയിച്ചില്ലെങ്കിൽ മന്ത്രിതലത്തിൽ ചർച്ച നടത്തുമെന്നും മന്ത്രി വ്യക്തമാക്കി. വിദ്യാർഥി കൺസെഷൻ വര്‍ധിപ്പിക്കണമെന്ന് ആവശ്യപ്പെട്ട് ചൊവ്വാഴ്ച സൂചന സമരം നടത്താനാണ് ബസുടമകളുടെ തീരുമാനം. വിദ്യാർഥികൾക്ക് കൺസഷൻ എളുപ്പമാക്കുന്നതിനായി ഒരു മൊബൈൽ ആപ്പ് പുറത്തിറക്കുമെന്നും മന്ത്രി അറിയിച്ചു. അതോടെ വിദ്യാർഥികൾക്ക് മാത്രം കൺസഷൻ ലഭിക്കുന്ന സ്ഥിതി ഉണ്ടാകും. എത്ര വിദ്യാർത്ഥികൾക്ക് കൺസക്ഷൻ ലഭിക്കുന്നു എന്ന കണക്ക് ആപ്പിലൂടെ കണ്ടെത്താനാകുമെന്നും മന്ത്രി പറ‍ഞ്ഞു.