ബിജെപി നേതൃത്വത്തിനെതിരെ രൂക്ഷവിമര്ശനം തുടര്ന്ന് സന്ദീപ് വാര്യര്. പാര്ട്ടിയിൽ നിന്ന് അവഗണനയും അപമാനവും നേരിടുന്ന നിരവധി സന്ദീപ് വാര്യര്മാര് പാലക്കാടുണ്ടെന്നും അത്തരക്കാരുടെ പ്രശ്നങ്ങള് പരിഹരിക്കാനുള്ള യാതൊരു ഇടപെടലും നേതൃത്വത്തിന്റെ ഭാഗത്തുനിന്ന് ഉണ്ടാകുന്നില്ലെന്നും ബിജെപിയിൽ ജനാധിപത്യ വിരുദ്ധ നടപടികളാണുണ്ടാകുന്നതെന്നും ഇനി പ്രതീക്ഷയില്ലെന്നും സന്ദീപ് വാര്യര് തുറന്നടിച്ചു. ഇപ്പോഴും ബിജെപി പ്രവര്ത്തകനാണ്.നടപടി നേരിടാൻ മാത്രം യോഗ്യതയുള്ള നേതാവല്ല താൻ.പാലക്കാട് പ്രചാരണത്തിന് പോകില്ലെന്നും സിപിഎമ്മുമായി ചര്ച്ച നടത്തിയിട്ടില്ലെന്നും സന്ദീപ് വാര്യര് പറഞ്ഞു
സംസ്ഥാന അധ്യക്ഷൻ രണ്ടു തവണ വിളിച്ചിരുന്നുവെന്ന് സന്ദീപ് വാര്യര് പറഞ്ഞു. പാലക്കാട് പ്രചാരണത്തിൽ സജീവമാകണമെന്ന് പറഞ്ഞിരുന്നു. തന്റെ പരാതികള് അപ്പോള് അറിയിച്ചിരുന്നെങ്കിലും പരിഹരിക്കാനുള്ള നടപടിയുണ്ടായില്ല. നടപടിയെടുക്കാൻ മാത്രം വലിയ നേതാവൊന്നുമല്ല.അതിനുള്ള യോഗ്യതയായിട്ടില്ല. വെറുമൊരു സംസ്ഥാന കമ്മിറ്റി അംഗം മാത്രമാണ്. എന്റെ നാട്ടിലെ ബിജെപി പ്രവര്ത്തകര്ക്കൊപ്പം തന്നെ തുടരും.ജാതിമത രാഷ്ട്രീയങ്ങള്ക്ക് അതീതമായിട്ടുള്ള പ്രവര്ത്തനമാണ് ഇവിടെ നടത്തിവരുന്നത്. അത് ഇവിടെ തുടരാൻ എനിക്ക് പ്രയാസമില്ല.സിപിഎമ്മുമായി യാതൊരു വിധ ചര്ച്ചയും നടന്നിട്ടില്ല.
മത്സരിക്കണമെന്നാണ് അഭിപ്രായപ്പെട്ടിരുന്നത്. അങ്ങനെയായിരുന്നെങ്കില് പ്രാദേശികമായ എതിര്പ്പുകള് ഒഴിവാക്കാമായിരുന്നു.എല്ലാവരെയും ചേര്ത്തുപിടിച്ചുകൊണ്ടായിരിക്കണം തെരഞ്ഞെടുപ്പിനെ നേരിടേണ്ടിവരുന്നത്.നേതൃത്വം ഇടപെട്ടിരുന്നെങ്കില് ഒരു വിളിയിൽ പരിഹരിക്കാവുന്ന വിഷയമാണ് ഇത്രയും വഷളാക്കിയത്. ഒരൊറ്റ ഫോണ് കോള് കൊണ്ട് പ്രശ്നം പരിഹരിക്കാമായിരുന്നുവെന്നും എന്നാൽ അതുണ്ടായില്ലെന്നും സന്ദീപ് വാര്യര് പറഞ്ഞു.
