പെൺസുഹൃത്തിന്റെ വീടിനുനേരെ ആക്രമണം; വാഹനം പൂർണമായി കത്തിനശിച്ചു, പ്രതി അറസ്റ്റിൽ

കൊച്ചി: പെൺസുഹൃത്തിന്റെ വീടിന് നേരെ ആക്രമണം നടത്തിയ യുവാവ് അറസ്റ്റിൽ. എറണാകുളത്ത് പെരുമ്പാവൂരിലാണ് സംഭവം. കൊല്ലം സ്വദേശി അനീഷിനെയാണ് പെരുമ്പാവൂർ പൊലീസ് പിടികൂടിയത്. യുവതിയുടെ വീടിനും സ്ഥലത്ത് നിർത്തിയിട്ടിരുന്ന വാഹനത്തിനും ഇയാൾ തീ വച്ചു. അനീഷുമായുള്ള സൗഹൃദത്തിൽ നിന്ന് പിന്മാറിയതാണ് പ്രകോപനത്തിന് കാരണമെന്ന് പൊലീസ് പറഞ്ഞു. യുവതിയുടെ മറ്റൊരു സുഹൃത്തിന്റെ വാഹനവും പൂർണമായി കത്തി നശിച്ചു.ഇന്ന് പുലർച്ചെയാണ് അനീഷ് യുവതിയുടെ വീട്ടിലെത്തിയത്. വർഷങ്ങളായി ഇരുവരും സുഹൃത്തുക്കളാണ്. അടുത്തിടെയാണ് യുവതി ബന്ധത്തിൽ നിന്നും പിന്മാറിയത്. ഇതിൽ പ്രകോപിതനായാണ് യുവാവ് വീട്ടിലെത്തിയതെന്നാണ് പൊലീസ് പറയുന്നത്. യുവാവ് പല തവണ വീടിന്റെ വാതിലിൽ മുട്ടിയിട്ടും തുറന്നില്ല. ഇതോടെയാണ് വീടിന് മുന്നിൽ നിർത്തിയിട്ടിരുന്ന യുവതിയുടെ മറ്റൊരു സുഹൃത്തിന്റെ ബൈക്കിനും വീടിനും തീയിട്ടത്. ബൈക്ക് പൂർണമായും കത്തി നശിച്ചു. വീടിന്റെ ചില ഭാഗങ്ങളും കത്തി നശിച്ചു. ജനൽച്ചില്ലുകൾ പൊട്ടിയ നിലയിലാണ്. വാതിൽ തുറക്കാതിരുന്നതിനാൽ, വീട്ടിലുണ്ടായിരുന്നവർ അപകടത്തിൽ നിന്ന് രക്ഷപ്പെട്ടു.