എടപ്പാളില്‍ ലഹരി സംഘം വടിവാള്‍ കാണിച്ച് ഭീഷണിപ്പെടുത്തി വിദ്യാര്‍ത്ഥിയെ ബൈക്കില്‍ തട്ടിക്കൊണ്ട് പോയി മര്‍ദ്ധിച്ചു.സംഭവത്തിന്റെ ദൃശ്യങ്ങള്‍ പുറത്ത് വന്നതോടെ പോലീസ് നടത്തിയ അന്വേഷണത്തില്‍ 3 പേര്‍ പിടിയിലായി.പൊന്നാനി സ്വദേശികളായ 19 വയസുള്ള മുബഷിര്‍ 18 വയസുള്ള
മുഹമദ് യാസിര്‍ എന്നിവരെ കൂടാതെ പൊന്നാനി സ്വദേശിയായ 17 വയസുകാരനും അടക്കം 3 പേരെയാണ് ചങ്ങരംകുളം പോലീസ് പിടികൂടിയത്
കഴിഞ്ഞ ദിവസം രാത്രിയാണ് സംഭവം.എടപ്പാള്‍ പൊന്നാനി റോഡില്‍ വച്ച് കുറ്റിപ്പാല സ്വദേശിയായ 18 കാരനോട് സംഘം സഹപാടിയായ വിദ്യാര്‍ത്ഥിയുടെ നമ്പര്‍ ചോദിച്ചു.നമ്പര്‍ കയ്യില്‍ ഇല്ല എന്ന് പറഞ്ഞതോടെ കയ്യില്‍ കരുതിയ വടിവാള്‍ എടുത്തു ഭീഷണിപ്പെടുത്തുകയായിരുന്നു.തുടര്‍ന്ന് ഓടി രക്ഷപ്പെട്ട വിദ്യാര്‍ത്ഥിയെ ബൈക്കില്‍ പിന്തുടര്‍ന്നെത്തിയ സംഘം വടിവാള്‍ കാണിച്ച് ഭീഷണിപ്പെടുത്തി ബൈക്കില്‍ കയറ്റി പൊന്നാനി ഭാഗത്തേക്ക് പോകുകയായിരുന്നു
ഇതിനിടെ റോഡിലൂടെ പോയ മറ്റൊരു വാഹനത്തിലെ യാത്രക്കാര്‍ സംഭവത്തിന്റെ ദൃശ്യങ്ങള്‍ എടുക്കുകയും പോലീസിന് കൈമാറുകയും ചെയ്തതു. തുടര്‍ന്ന് സംഭവ സ്ഥലത്ത് എത്തിയ ചങ്ങരംകുളം പോലീസ് ഇവരെ പിന്തുടരുകയും ചെയ്തു.പോലീസ് പിന്തുടരുന്നുണ്ടെന്ന് അറിഞ്ഞതോടെ യുവാവിനെ പൊന്നാനി ഐശ്വര്യ തിയ്യറ്ററിനടുത്ത് ഇറക്കി വിട്ട് സംഘം രക്ഷപ്പെട്ടു
ചങ്ങരംകുളം സിഐ ഷൈനിന്റെ നേതൃത്വത്തില്‍ പോലീസ് നടത്തിയ അന്വേഷണത്തില്‍ പ്രദേശത്തെ ലഹരി സംഘങ്ങളാണ് സംഭവത്തിന് പിന്നിലെന്ന് തിരിച്ചറിയുകയും ചെയ്തിരുന്നു. തുടര്‍ന്ന് നടത്തിയ അന്വേഷണത്തിലാണ് പ്രതികളായ മൂന്ന് പേരെയും പോലീസ് പിടികൂടിയത്.കൗമാരക്കാരായ സംഘം ലഹരി ഉപഭോക്താക്കളും ഇടപാടുകാരും ആണെന്നാണ് പോലീസ് നല്‍കുന്ന വിവരം.ജാമ്യം ലഭിക്കാത്ത വകുപ്പ് ചുമത്തിയാണ് ഇവര്‍ക്കെതിരെ പോലീസ് കേസെടുത്തിരിക്കുന്നത്
