റെക്കോർഡിൽ നിന്ന് താഴേക്ക്, ഇന്നും സ്വർണ വില ഇടിഞ്ഞു: ആഭരണപ്രേമികൾക്ക് ആശ്വസിക്കാം

തിരുവനന്തപുരം; സംസ്ഥാനത്ത് സ്വർണവില വീണ്ടും കുറഞ്ഞു. പവന് 320 രൂപയാണ് ഇന്ന് കുറഞ്ഞത്. നിലവില്‍ കേരളത്തില്‍ 1 പവന്‍ സ്വര്‍ണത്തിന്റെ വില 64,080 രൂപയാണ്. ഇന്നലെ 64,400 രൂപയായിരുന്നു ഒരു പവന്‍ സ്വര്‍ണത്തിന്റെ വില. ഇന്ന് രാജ്യാന്തര സ്വർണ്ണ വ്യാപാരം ഫ്ലാറ്റ് നിലവാരത്തിലാണ് നടക്കുന്നത്. നിലിവില്‍ രാജ്യാന്തര വിപണിയില്‍ ട്രോയ് ഔൺസിന് 1.19 ഡോളർ (0.04%) താഴ്ന്ന് 2,905.79 ഡോളർ നിരക്കിലാണ് വ്യാപാരം നടക്കുന്നത്. ഇന്നത്തെ വിലപ്രകാരം 10 ​ഗ്രാം സ്വർണം വാങ്ങാൻ 80,100 രൂപയാവുന്നു. 24 കാരറ്റ് സ്വർണത്തിന് ഒരു ​ഗ്രാമിന് 8738 രൂപയും പവന് 69,904 രൂപയുമാവുന്നു. 18 ​കാരറ്റിന് ഒരു ​ഗ്രാമിന് 6554 രൂപയും പവന് 52,432 രൂപയുമാണ്. ഇന്ന് ഡോളറിനെതിരെ രൂപയുടെ മൂല്യം കുത്തനെ ഇടിഞ്ഞു. അതോടെ ഡോളർ ശക്തിപ്രാപിക്കുകയും ഇത് സ്വർണ വിലയെ തളർത്തുകയും ചെയ്തു. യു.എസ് പ്രസിഡൻ്റ് ഡൊണാൾഡ് ട്രംപിൻ്റെ താരിഫ് നയങ്ങൾ മൂലം ആഗോള വ്യാപാരയുദ്ധ ഭീഷണികൾ ഉയർന്നിരുന്നെങ്കിലും രണ്ട് ദിവസമായി ഡോളർ ശക്തിയാർജ്ജിച്ചത് സ്വർണത്തിന് തളർച്ചയായി. മാത്രമല്ല യുഎസിന്റെ സമ്പദ്‍വ്യവസ്ഥ വീണ്ടും തളരുന്നുവെന്ന സൂചനകൾ പ്രചരിച്ചതും സ്വർണ വില ഇടിയാൻ കാരണമായി. എങ്കിലും വരും ദിവസങ്ങളിൽ സ്വർണ കുതിക്കുമെന്നാണ് വിദഗ്ദർ പറയുന്നത്. ഫെബ്രുവരി 25നായിരുന്നു ഏറ്റവും ഉയർന്ന സ്വർണ വില രേഖപ്പെടുത്തിയത്. അന്ന് 64,600 രൂപയായിരുന്നു 22 കാരറ്റ് സ്വർണ വില.