തവനൂർ: പതിനെട്ടാമത് മുസാബഖ കലാ-സാഹിത്യ മത്സരങ്ങളുടെ ഭാഗമായുള്ള തവനൂർ റെയ്ഞ്ച് തല കലാമേളയ്ക്ക് മൂവാങ്കരയിൽ വർണാഭമായ തുടക്കം. മൂവാങ്കര മഹല്ല് പ്രസിഡന്റ് പി. കുഞ്ഞാവു ഹാജി പതാക ഉയർത്തി.
മാനേജ്മെന്റ് പ്രസിഡന്റ് സയ്യിദ് അക്ബറലി ശിഹാബ് തങ്ങൾ അധ്യക്ഷത വഹിച്ച ചടങ്ങ് എസ്.എം.എഫ് മലപ്പുറം ജില്ലാ ഉപാധ്യക്ഷൻ സയ്യിദ് കെ.കെ.എസ് ആറ്റക്കോയ തങ്ങൾ നരിപ്പറമ്പ് ഉദ്ഘാടനം ചെയ്തു. സുലൈമാൻ അൽ ഹസനി പ്രാർത്ഥന നിർവഹിച്ചു.
മുസാബഖ കൺവീനർ റാഫി മൗലവി, റെയ്ഞ്ച് സെക്രട്ടറി ഉമറുൽ ഫാറൂഖ് മൗലവി, റെയ്ഞ്ച് പ്രസിഡന്റ് ഹസ്സൻ ഫൈസി, മാനേജ്മെന്റ് സെക്രട്ടറി വീരാൻകുട്ടി ഹാജി, ഐഡിയൽ മജീദ്, സൈദലവി ഹാജി, മുഹമ്മദ് ഹാജി, ആബിദ് മദനി തുടങ്ങിയവർ സംസാരിച്ചു.
14 മദ്രസകളിൽ നിന്നായി 500-ലധികം വിദ്യാർത്ഥികളാണ് കലാമേളയിൽ വിവിധ ഇനങ്ങളിലായി മാറ്റുരയ്ക്കുന്നത്. 11 വിഭാഗങ്ങളിലായി ആകെ 60 ഇനങ്ങളിലാണ് മത്സരങ്ങൾ നടക്കുന്നത്. ഇതിനായി അഞ്ച് പ്രത്യേക വേദികൾ സജ്ജീകരിച്ചിട്ടുണ്ട്.
ഒന്നാം ദിവസമായ ഇന്നലെ വൈകിട്ട് 4 മണിക്ക് ഔദ്യോഗിക ഉദ്ഘാടന സമ്മേളനം നടന്നു. തുടർന്ന് മഗ്‌രിബ് നമസ്കാരത്തിന് ശേഷം അറബി ഗാനം, ബുർദ ആലാപനം, ദഫ് മുട്ട് തുടങ്ങിയ മത്സരങ്ങൾ അരങ്ങേറി. ഇന്ന് രാവിലെ 7.30 മുതൽ അഞ്ച് വേദികളിലുമായി വിവിധ മത്സരങ്ങൾ പുരോഗമിക്കുകയാണ്.
ഇന്ന് വൈകിട്ട് 5 മണിക്ക് നടക്കുന്ന സമാപന സമ്മേളനം തവനൂർ എം.എൽ.എ വി.എസ്. ജോയ് ഉദ്ഘാടനം ചെയ്യും. വിജയികൾക്കുള്ള സമ്മാനദാനവും അദ്ദേഹം നിർവഹിക്കും. ചടങ്ങിൽ ജനപ്രതിനിധികൾ, സാദാത്തുക്കൾ, ഉലമാ-ഉമറാക്കൾ, വിദ്യാർത്ഥികൾ, പൊതുജനങ്ങൾ തുടങ്ങിയവർ സംബന്ധിക്കും.
