ചാവക്കാട്: ചാവക്കാട് ഓടിക്കൊണ്ടിരുന്ന ബസില്‍ നിന്നും ഗര്‍ഭിണിയായ യുവതി പുറത്തേക്ക് തെറിച്ചുവീണ സംഭവത്തില്‍ ഡ്രൈവറും കണ്ടക്ടറും അറസ്റ്റില്‍.ഡ്രൈവര്‍ ചാലിശ്ശേരി സ്വദേശി പ്രകാശന്‍, കണ്ടക്ടര്‍ തളി സ്വദേശി കാളിദാസന്‍ എന്നിവരാണ് അറസ്റ്റിലായത്. ബസ് ജീവനക്കാര്‍ക്കെതിരെ പൊലീസ് വധശ്രമത്തിന് കേസെടുത്തു. അന്വേഷണത്തിന്റെ ഭാഗമായി ബസും കസ്റ്റഡിയിലെടുത്തു.
ഇന്നലെ രാവിലെ ചാവക്കാട് തെക്കേ ബൈപാസ് വളവിലാണ് അപകടം ഉണ്ടായത്. വളവ് തിരിയുന്നതിനിടെ ബസിന്റെ പുറകിലെ വാതിലിലൂടെ യുവതി പുറത്തേക്ക് തെറിച്ചു വീഴുകയായിരുന്നു.അപകടത്തെ തുടര്‍ന്ന് ഹയാത്ത് ആശുപത്രിയില്‍ ചികിത്സയിലായിരുന്ന ചാവക്കാട് സ്വദേശി ഫാത്തിമ ആശുപത്രി വിട്ടു. മമ്മിയൂര്‍ ലിറ്റില്‍ ഫ്ലവർ കോളജിലെ വിദ്യാര്‍ഥിനിയാണ് ഫാത്തിമ.
