റിപ്പോർട്ടർ ടി.വി. ആസ്ഥാനത്തേക്ക് പൊലീസ് അതിക്രമിച്ച് കയറിയ സംഭവത്തിൽ ശക്തമായ പ്രതിഷേധം രേഖപ്പെടുത്തി കേരള പത്രപ്രവർത്തക യൂണിയൻ (KUWJ) തിരുവനന്തപുരം ജില്ലാ കമ്മിറ്റി. മാധ്യമ സ്ഥാപനങ്ങളുടെ പ്രവർത്തന സ്വാതന്ത്ര്യത്തെയും മാധ്യമപ്രവർത്തകരുടെ അവകാശങ്ങളെയും ചോദ്യം ചെയ്യുന്ന ഇത്തരം നടപടികൾ ജനാധിപത്യ സമൂഹത്തിന് അംഗീകരിക്കാനാകാത്തതാണ്. മാധ്യമ സ്ഥാപനങ്ങളിൽ പൊലീസ് പ്രവേശിക്കുന്ന സാഹചര്യം സൃഷ്ടിക്കപ്പെടുന്നത് ഗൗരവത്തോടെ കാണേണ്ടതുണ്ട്.മാധ്യമപ്രവർത്തകർക്ക് സ്വതന്ത്രമായി പ്രവർത്തിക്കാനുള്ള സാഹചര്യം ഉറപ്പാക്കണമെന്നും, മാധ്യമ സ്ഥാപനങ്ങളുടെ പ്രവർത്തനത്തിൽ അനാവശ്യമായ ഇടപെടലുകൾ ഒഴിവാക്കണമെന്നും ജില്ലാ കമ്മിറ്റി പ്രസിഡന്റ് ഷില്ലർ സ്റ്റീഫനും സെക്രട്ടറി അനുപമ ജി. നായരും അറിയിച്ചു.
ഇന്ന് പുലർച്ചയോടെയാണ് കൊച്ചിയിലെ റിപ്പോർട്ടർ ടിവി ആസ്ഥാനത്തേക്ക് യാതൊരു മുന്നറിയിപ്പുമില്ലാതെ പൊലീസ് ഉദ്യോഗസ്ഥർ പരിശോധനയ്ക്കെത്തിയത്. ചാനൽ ഡെസ്കിലേക്കെത്തിയ പൊലീസുകാർ മാധ്യമപ്രവർത്തകരുടെ ഫോണുകൾ സമ്മർദ്ദം ചെലുത്തി വാങ്ങിവയ്ക്കുകയായിരുന്നു. ഇതോടെ ഒന്നേ കാൽ മണിക്കൂറോളം ചാനൽ പ്രവർത്തനങ്ങളും ലൈവ് പരിപാടികൾ സംപ്രേഷണം ചെയ്യുന്നതും തടസപ്പെടുകയായിരുന്നു.
