മെഗാസ്റ്റാർ മമ്മൂട്ടിക്ക് പിറന്നാളാശംസകൾ നേർന്ന് എം.ടി.എം കോളേജ് ‘ബർത്ത്‌ഡേ കോർണറിന് തുടക്കമായി

വെളിയങ്കോട്:മെഗാസ്റ്റാർ മമ്മൂട്ടിയുടെ പിറന്നാൾ ദിനമായ സെപ്റ്റംബർ ഏഴിന് എം.ടി.എം കോളേജിൽ വിദ്യാർഥികൾ വിപുലമായ ആഘോഷപരിപാടികൾ സംഘടിപ്പിച്ചു.കേക്ക് മുറിച്ചും ക്യാമ്പസിൽ പ്രത്യേക പിറന്നാൾ മരം നട്ടുമാണ് വിദ്യാർഥികൾ തങ്ങളുടെ പ്രിയ നടന്റെ പിറന്നാൾ അവിസ്മരണീയമാക്കിയത്.ആഘോഷങ്ങളുടെ ഭാഗമായി ക്യാമ്പസിൽ വിദ്യാർഥികൾക്കായി തയാറാക്കിയ പ്രത്യേക ‘ബർത്ത്ഡേ കോർണറിന്റെ’ ഉദ്ഘാടനം പ്രിൻസിപ്പൽ ഡോ. രജത് നിർവഹിച്ചു.വിദ്യാർഥികളുടെ പിറന്നാൾ ആഘോഷങ്ങൾക്കായി ഇടമൊരുക്കുന്നതിനൊപ്പം ഒത്തുകൂടലുകൾക്കും സർഗാത്മക ചർച്ചകൾക്കും ക്യാമ്പസിലെ ഇത്തരം ഇടങ്ങൾ വഴിയൊരുക്കട്ടെയെന്ന് അദ്ദേഹം ആശംസിച്ചു.ലോകത്തിലെ തന്നെ മികച്ച നടന്മാരിൽ ഒരാളായ മമ്മൂട്ടിയുടെ പിറന്നാൾ ദിനത്തിൽ ഇത്തരമൊരു സംരംഭത്തിന് തുടക്കമിടാൻ കഴിഞ്ഞതിൽ വലിയ സന്തോഷവും അഭിമാനവുമുണ്ടെന്നും അദ്ദേഹം കൂട്ടിച്ചേർത്തു.പി.ആർ.ഒ ഫൈസൽബാവ അധ്യക്ഷത വഹിച്ച ചടങ്ങിൽ വൈസ് പ്രിൻസിപ്പൽ ഡോ. മുഹമ്മദ് ഷഫീർ, അധ്യാപകരായ അശ്വതി,സുഹറബീവി, ആഷിക് എൻ.പി എന്നിവർ പങ്കെടുത്തു.ക്യാമ്പസിലെ പിറന്നാൾ ദിനങ്ങൾ കൂടുതൽ മനോഹരമാക്കാൻ ലക്ഷ്യമിട്ട് ആരംഭിച്ച ‘ബർത്ത്ഡേ കോർണർ’ വലിയ ആവേശത്തോടെയാണ് വിദ്യാർഥികൾ ഏറ്റെടുത്തത്.