എടപ്പാൾ:പൊന്നാനിയുടെ വിനോദസഞ്ചാര വികസനത്തിന് പുതിയ ദിശാബോധം നൽകുന്ന ‘ടൂറിസം ഗേറ്റ്വേ’പദ്ധതിക്ക് തുടക്കമായി.പൊന്നാനി താലൂക്ക് ടൂറിസം സൊസൈറ്റിയുടെ ആഭിമുഖ്യത്തിൽ ഓണാഘോഷത്തോടനുബന്ധിച്ച് സംഘടിപ്പിച്ച സാംസ്കാരിക സംഗമത്തിൽ പദ്ധതിയുടെ പ്രോജക്ട് പ്രദർശനവും ഓഹരി കൈമാറ്റവും നടന്നു.കെ. സദാനന്ദൻ സ്വാഗതം പറഞ്ഞ ചടങ്ങില് തവനൂർ നിയോജകമണ്ഡലം എം.എൽ.എ. അഡ്വ. വി.എസ്. ജോയ് അധ്യക്ഷത വഹിച്ചു. പൊന്നാനി താലൂക്ക് ഗവ. ആൻഡ് ക്വാസി ഗവ. എംപ്ലോയീസ് കോ-ഓപ്പറേറ്റീവ് സൊസൈറ്റി പ്രസിഡന്റും മുൻ എം.പിയുമായ സി. ഹരിദാസ് ഉദ്ഘാടനം നിർവഹിച്ചു.
‘പൊന്നാനി കാണുക, പൊന്നാനി അറിയുക’ എന്ന ലക്ഷ്യത്തോടെ ദേശീയപാതയോരത്ത് നടപ്പാക്കുന്ന ടൂറിസം ഗേറ്റ്വേ പദ്ധതിയുടെ വിശദാംശങ്ങൾ കേരള കൺസോർഷ്യം ഫാർമർ പ്രൊഡ്യൂസർ കമ്പനി ലിമിറ്റഡ് (ആർ.സി.എസ്.) സി.ഇ.ഒ. സജി പി. അവതരിപ്പിച്ചു.പദ്ധതിയുടെ പ്രഥമ ഓഹരി ഡോ.രാജാസ് ആയുർവേദ ആശുപത്രി മാനേജിങ് ഡയറക്ടർ ഡോ.അരുൺ രാജിൽ നിന്ന് അഡ്വ. വി.എസ്. ജോയ് എം.എൽ.എ. ഏറ്റുവാങ്ങി.
മേഖലയിലെ മുതിർന്ന സഹകാരികളെയും പൊതുപ്രവർത്തകരെയും ചടങ്ങിൽ ആദരിച്ചു. മുൻ എം.പി. സി. ഹരിദാസ്, സി.പി. ബാവ ഹാജി, സി. രാഘവൻ, കെ. ഗോപാലകൃഷ്ണൻ, സി.പി. നാരായണൻ നായർ, മുൻ അഡീഷണൽ സെക്രട്ടറി അബ്ദുൽ ലത്തീഫ് മാറഞ്ചേരി, ഡോ. അരുൺ രാജ് എന്നിവർ ആദരം ഏറ്റുവാങ്ങി.എടപ്പാൾ ഗ്രാമപഞ്ചായത്ത് പ്രസിഡന്റ് കെ.പി. സിന്ധു, നന്നംമുക്ക് ഗ്രാമപഞ്ചായത്ത് പ്രസിഡന്റ് ശാന്തിനി രവീന്ദ്രനാഥ്,നന്നംമുക്ക് ഗ്രാമപഞ്ചായത്ത് അംഗം മുസ്തഫ ചാലുപറമ്പിൽ,കേരള ടൂർ ഫെഡ് മാർക്കറ്റിങ് മാനേജർ ജി. ശ്യാം, ഡോ. രാജാസ് ആയുർവേദ ആശുപത്രി എം.ഡി. ഡോ. അരുൺ രാജ്, ചങ്ങരംകുളം സർവീസ് സഹകരണ ബാങ്ക് പ്രസിഡന്റ് സിദ്ദീഖ് പന്താവൂർ എന്നിവർ സംസാരിച്ചു.ജനപ്രതിനിധികൾ,തദ്ദേശസ്ഥാപന അധ്യക്ഷന്മാർ,സഹകരണ മേഖലയിലെ പ്രമുഖർ, വിവിധ സംഘടനാ പ്രതിനിധികൾ തുടങ്ങിയവർ പങ്കെടുത്തു.തുടർന്ന് ഗംഗ ശശിധരന്റെ വയലിൻ കച്ചേരിയും ഷിഹാബ് പാലപ്പെട്ടിയുടെ ഗസൽ സന്ധ്യയും അരങ്ങേറി.
