ചങ്ങരംകുളത്ത് പി.എസ്.സി./സിവിൽ സർവീസ് കോച്ചിംഗ് സബ് സെന്റർ ആരംഭിക്കണം:മന്ത്രി അഡ്വ എൻ.ഷംസുദ്ദീന് നിവേദനം നൽകി

ചങ്ങരംകുളം:മലപ്പുറം, പാലക്കാട്,തൃശൂർ ജില്ലകളിലെ വിദ്യാർത്ഥികൾക്ക് ഒരുപോലെ പ്രയോജനപ്പെടുന്ന തരത്തിൽ ചങ്ങരംകുളത്ത് ന്യൂനപക്ഷ ക്ഷേമ വകുപ്പിന്റെ കീഴിൽ പി.എസ്.സി./സിവിൽ സർവീസ് കോച്ചിംഗ് സബ് സെന്റർ അനുവദിക്കണമെന്ന് ആവശ്യപ്പെട്ട് ചങ്ങരംകുളം ഡിവിഷൻ ജില്ലാ പഞ്ചായത്ത് അംഗം അഷ്ഹർ പെരുമുക്ക് വിദ്യാഭ്യാസ &ന്യൂനപക്ഷ ക്ഷേമ വകുപ്പ് മന്ത്രി അഡ്വ. എൻ.ഷംസുദ്ദീന് നിവേദനം നൽകി.ഗ്രാമീണ മേഖലകളിലെ വിദ്യാർത്ഥികൾക്ക് ഗുണമേന്മയുള്ള മത്സരപരീക്ഷാ പരിശീലനം നഗരങ്ങളെ ആശ്രയിക്കാതെ ലഭ്യമാക്കേണ്ടത് കാലഘട്ടത്തിന്റെ ആവശ്യകതയാണെന്ന് നിവേദനത്തിൽ ചൂണ്ടിക്കാട്ടി.സാമ്പത്തിക പരിമിതികളും ദൂരയാത്രയുടെ ബുദ്ധിമുട്ടുകളും മൂലം നിരവധി വിദ്യാർത്ഥികൾ മികച്ച പരിശീലന അവസരങ്ങളിൽ നിന്ന് വിട്ടുനിൽക്കുന്ന സാഹചര്യം പരിഗണിച്ച് ചങ്ങരംകുളത്ത് സബ് സെന്റർ ആരംഭിക്കുന്നത് മൂന്ന് ജില്ലകളിലെയും വിദ്യാർത്ഥികൾക്ക് വലിയ ആശ്വാസമാകുമെന്ന് അദ്ദേഹം വ്യക്തമാക്കി.മലപ്പുറം,പാലക്കാട്, തൃശൂർ ജില്ലകളുടെ സംഗമ മേഖലയായ ചങ്ങരംകുളത്തിന്റെ ഭൂമിശാസ്ത്രപരമായ പ്രത്യേകതയും മികച്ച ഗതാഗത സൗകര്യവും ഇത്തരമൊരു സ്ഥാപനത്തിന് അനുയോജ്യമാണെന്നും, സർക്കാർ ഈ ആവശ്യം അനുഭാവപൂർവം പരിഗണിച്ച് അനുകൂല തീരുമാനം കൈക്കൊള്ളുമെന്ന് പ്രതീക്ഷിക്കുന്നതായും അഷ്ഹർ പെരുമുക്ക് പറഞ്ഞു