തൃശൂർ ചാവക്കാട് കടലിൽ ശക്തമായ തിരയിൽ അകപ്പെട്ട വിദ്യാർത്ഥി മരിച്ചു. ചാവക്കാട് തൊട്ടാപ്പ് സ്വദേശി ഇജാസ് ആണ് മരിച്ചത്. 14 വയസ്സ് ആയിരുന്നു. കൂട്ടുകാർക്കൊപ്പം കടൽതീരത്ത് കുളിക്കുന്നതിനിടെ ഉണ്ടായ ശക്തമായ വേലിയേറ്റമാണ് അപകടത്തിന് കാരണമായത്. ഇജാസും മറ്റ് രണ്ട് കൂട്ടുകാരും ചേർന്ന് കടലിൽ കുളിക്കാൻ ഇറങ്ങിയ സമയത്ത് ശക്തമായ തിരയടിക്കുകയും മൂന്നുപേരും കടലിനുള്ളിലേക്ക് ഒലിച്ചുപോവുകയുമായിരുന്നു.
നീന്തി രക്ഷപ്പെടാൻ കഴിയാതെ വന്നതോടെ കുട്ടികൾ ബഹളം വെച്ചു.ബഹളം കേട്ട് ഓടിയെത്തിയ പ്രദേശവാസികൾ രണ്ട് കുട്ടികളെ ഉടൻ തന്നെ രക്ഷപ്പെടുത്തിയെങ്കിലും ഇജാസിനെ കണ്ടെത്താനായില്ല. തുടർന്ന് നാട്ടുകാർ നടത്തിയ ഏതാണ്ട് ഒരു മണിക്കൂർ നീണ്ട തിരച്ചിലിനൊടുവിലാണ് ഇജാസിന്റെ മൃതദേഹം കടലിൽ നിന്നും കണ്ടെടുത്തത്. സംഭവസ്ഥലത്തെത്തിയ പോലീസ് മേൽ നടപടികൾ സ്വീകരിച്ചു.
