‘എല്ലാത്തിനും പിന്തുണ സഹോദരൻ’; കാഴ്‌ചപരിമിതിയുള്ള അജയ്‌ക്ക് സിവിൽ സർവീസിൽ 109-ാം റാങ്ക്

കോഴിക്കോട്: കാഴ്‌ച പരിമിതികളെ അതിജീവിച്ച് കേരളത്തിന് അഭിമാനമായി കോഴിക്കോട് തൊട്ടിൽപ്പാലം സ്വദേശി അജയ് ആർ രാജ്. 109-ാം റാങ്ക് ആണ് അജയ് സ്വന്തമാക്കിയത്. അഞ്ചാം ശ്രമത്തിലാണ് അജയ് സിവിൽ സർവീസ് പരീക്ഷയിൽ വിജയം നേടിയെടുത്തത്.ഡൽഹി സെന്റ് സ്റ്റീഫൻസ് കോളേജിൽ പഠിക്കുന്ന കാലത്താണ് അജയ്‌യുടെ മനസിലേക്ക് സിവിൽ സർവീസ് എന്ന സ്വപ്‌നം ഉണ്ടാകുന്നത്. ഇതേ കോളേജിൽ തന്നെ ഇംഗ്ലീഷിൽ ബിരുദവും ബിരുദാനന്തര ബിരുദവും അജയ് പൂർത്തിയാക്കി. ശേഷം തിരുവനന്തപുരത്തെ ലീഡ് ഐഎഎസ് അക്കാഡമിയിലാണ് കോച്ചിംഗ് നടത്തിയത്. ആദ്യ രണ്ട് ശ്രമങ്ങൾക്ക് കാര്യമായ പ്രാധാന്യം നൽകിയിരുന്നില്ലെന്നും പിന്നീട് നടത്തിയ മൂന്ന് ശ്രമങ്ങളിലാണ് ഫോക്കസ് നൽകിയതെന്നും അജയ് പറഞ്ഞു. അക്കാഡമി ഒരുക്കിയ പഠനാന്തരീക്ഷം ഈ വിജയത്തിന് വലിയൊരു പങ്കുവഹിച്ചുവെന്നും മുന്നൊരുക്കങ്ങൾ മുതൽ മൂല്യനിർണയം വരെ എല്ലാ കാര്യങ്ങളിലും അവർ ഏറെ സഹായിച്ചുവെന്നും അജയ് പറഞ്ഞു.കഴിഞ്ഞ തവണ അജയ്‌ക്ക് 730-ാം റാങ്കായിരുന്നു. അക്കാഡമിയിൽ നിന്ന് പറയുന്നതനുസരിച്ച് എല്ലാ പരീക്ഷകളും കൃത്യമായി എഴുതി. ഐഎഎസ് ആണ് കൂടുതൽ താൽപ്പര്യം. വീട്ടിലെല്ലാവരും വളരെ സന്തോഷത്തിലാണ്. ഒരുപാടുപേരുടെ പിന്തുണ ഇതിന് പിന്നിലുണ്ട്. ലക്ഷ്യത്തിലെത്താൻ എപ്പോഴും പരിശ്രമിച്ചുകൊണ്ടിരിക്കുക. എന്റെ സഹോദരനാണ് ഏറ്റവും കൂടുതൽ എന്നെ സപ്പോർട്ട് ചെയ്‌ത് കൂടെ നിൽക്കുന്നത്. അദ്ദേഹമാണ് എന്റെ വഴികാട്ടിയെന്നും അജയ് പറഞ്ഞു.സ്വകാര്യ കോളേജിലെ അസിസ്റ്റന്റ് പ്രൊഫസർ ആയിരുന്നു അജയ്.