അപകടാവസ്ഥയിലുള്ള കെട്ടിടം പൊളിച്ച് മാറ്റണമെന്ന ആവശ്യം ശക്തമാകുന്നു

ചങ്ങരംകുളം:അപകടാവസ്ഥയിലുള്ള കെട്ടിടം പൊളിച്ച് മാറ്റണമെന്ന ആവശ്യം ശക്തമാകുന്നു.ചങ്ങരംകുളം ടൗണിലെ പഴക്കമുള്ള ഓടിട്ട കെട്ടിടമാണ് പൊതു ജനങ്ങള്‍ക്ക് ഭീഷണി ഉയര്‍ത്തുന്നത്.നൂറ് കണക്കിന് വാഹനങ്ങളും വിദ്യാര്‍ത്ഥികള്‍ അടക്കമുള്ള നിരവധി യാത്രക്കാരും ദിനം പ്രതി സഞ്ചരിക്കുന്ന തിരക്കേറിയ പ്രധാന പാതയിലാണ് അപകടാവസ്ഥയിലുള്ള കെട്ടിടം.ഓടുകളും മറ്റു കെട്ടിടാവശിഷ്ടങ്ങളും പൊട്ടി പൊളിഞ്ഞ അവസ്ഥയിലായിട്ട് വര്‍ഷങ്ങളായി. പലപ്പോഴും പൊട്ടിയ ഓടുകളും കെട്ടിടാവശിഷ്ടങ്ങളും റോഡിലേക്ക് വീഴുന്നതും അപകടങ്ങള്‍ക്ക് കാരണമാകുന്നുണ്ട്.കെട്ടിടത്തിന്റെ ശോചനീയാവസ്ഥ മൂലം കച്ചവടക്കാര്‍ പലരും കടകള്‍ ഒഴിഞ്ഞു.ഏതാനും കച്ചവടക്കാര്‍ ഇപ്പോഴും ഇവിടെ കച്ചവടം തുടരുന്നുണ്ട്.ടൗണ്‍ നവീകരണത്തിന്റെ ഭാഗമായി കെട്ടിടത്തിന്റെ മുന്‍വശത്തെ ഭാഗം അധികൃതര്‍ പൊളിച്ച് നീക്കിയിരുന്നു.ഏത് നിമിഷവും അപകടം ഉണ്ടാവുന്ന അവസ്ഥയിലാണ് കെട്ടിടമെന്നും കെട്ടിടം പൊളിച്ച് മാറ്റാന്‍ അധികൃതര്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം