പറക്കുളം: കല്ലടത്തൂർ പ്രദേശത്ത് രണ്ട് പശുക്കൾ പേവിഷബാധയെ തുടർന്ന് ചത്തു. ലക്ഷ്മി നിവാസിൽ സുഭേദയുടെ ഉടമസ്ഥതയിലുള്ള പശുക്കളാണ് രോഗബാധയേറ്റ് ചത്തത്. പശുക്കൾക്ക് എങ്ങനെയാണ് പേവിഷബാധ ഉണ്ടായതെന്നത് വ്യക്തമല്ല.
അസുഖലക്ഷണങ്ങൾ കണ്ടതിനെ തുടർന്ന് ഡോക്ടറെ വിളിച്ചു പരിശോധിച്ചപ്പോഴാണ് പേവിഷബാധ സ്ഥിരീകരിച്ചത്. അധികൃതരുടെ നിർദേശപ്രകാരം വീട്ടുകാർ പ്രതിരോധ കുത്തിവയ്പ് ആരംഭിച്ചു. പശുക്കളുടെ പാൽ തിളപ്പിക്കാതെ ഉപയോഗിച്ചവർ ഉണ്ടെങ്കിൽ ഉടൻ കുത്തിവയ്പ് എടുക്കണമെന്ന് ആരോഗ്യവകുപ്പ് അറിയിച്ചു. മേഖലയിൽ തെരുവുനായ്ക്കൾക്കെതിരെ കർശന നടപടി സ്വീകരിക്കണമെന്നാവശ്യപ്പെട്ട് നാട്ടുകാർ രംഗത്തെത്തി.
