സാംസ്കാരികോത്സവം:സ്‌മരണകളുടെ പൂമുഖം’അനുസ്‌മരണവും സാംസ്‌കാരിക സദസ്സും ഒക്ടോബര്‍ 5ന് മൂക്കുതല സ്കൂളില്‍ നടക്കും

ചങ്ങരംകുളം:കേരള സംസ്ഥാന സാംസ്‌കാരിക വകുപ്പിൻ്റ സഹകരണത്തോടെ സംഘടിപ്പിക്കുന്ന സാംസ്‌കാരികോത്സവത്തിന് പൊന്നാനിയില്‍ തുടക്കം കുറിച്ചതായി എംഎല്‍എ പി നന്ദകുമാര്‍ വാര്‍ത്താസമ്മേളനത്തില്‍ അറിയിച്ചു.പൊന്നാനി മണ്ഡലത്തിൽ കോതമുക്ക്,പൊന്നാനി, മൂക്കുതല എന്നീ മൂന്ന് മേഖലകളില്‍ പൊന്നാനി കൾച്ചറൽ ഫെസ്റ്റിവൽ 2025 എന്ന പേരിലാണ് പരിപാടി നടക്കുന്നത്.പൊന്നാനിയുടെ സാമൂഹിക ജീവിതം കെട്ടിപ്പടുക്കുന്നതിൽ നിർണ്ണായക പങ്ക് വഹിച്ച കൊളാടി ബാലകൃഷ്‌ണൻ എന്ന കൊളാടി ഉണ്ണി, ഇ.കെ ഇമ്പിച്ചി ബാവ, പി. ചിത്രൻ നമ്പൂതിരിപ്പാട് എന്നിവരുടെ സ്‌മരണാർത്ഥമാണ്സാംസ്‌കാരികോത്സവം സംഘടിപ്പിച്ചിരിക്കുന്നത്.ഫെസ്റ്റിവലിന്റെ ഭാഗമായി ഒക്ടോബർ 5 ന് മൂക്കുതല ഗവൺമെൻ്റ് ഹൈസ്‌കൂളിൽ സ്‌മരണകളുടെ പൂമുഖം എന്ന പേരിൽ പി. ചിത്രൻ നമ്പൂതിരിപ്പാട് അനുസ്‌മരണവും സാംസ്‌കാരിക സദസ്സും,കലാപരിപാടികളും നടക്കും. ഉന്നത വിദ്യാഭ്യാസ മന്ത്രി പ്രൊഫ.ആർ. ബിന്ദു പരിപാടി ഉദ്ഘാടനം ചെയ്യും,ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തും. തൃശൂർ എം.എൽ.എ. പി.ബാലചന്ദ്രൻ മുഖ്യാതിഥിയാകും. തുടർന്ന് പുഷ്പവതി പൊയ്പ്‌പാടത്തിന്റെ സംഗീത വിരുന്നും അരങ്ങേറും.നാടിന്റെ സാമൂഹിക പരിഷ്കരണ രംഗത്തും വിദ്യാഭ്യാസ പുരോഗതിയിലും വലിയ സംഭാവനകൾ നൽകിയ പി. ചിത്രൻ നമ്പൂതിരിപ്പാടിൻ്റെ സ്‌മരണകളുടെ പശ്ചാത്തലത്തിൽ നടക്കുന്ന പരിപാടിയിലും പൊതുജനങ്ങളുടെ പങ്കാളിത്വം ഉണ്ടാവണമെന്നും എംഎല്‍എ പറഞ്ഞു. എംഎല്‍എ യോടൊപ്പം ടി സത്യന്‍,കരീം കോഴിക്കല്‍ എന്നിവരും ചങ്ങരംകുളം പ്രസ് ക്ളബ്ബില്‍ നടന്ന വാര്‍ത്താസമ്മേളനത്തില്‍ പങ്കെടുത്തു